RSS

الأربعاء، 29 ديسمبر 2010

من اهم احداث 2010 ( وبلاويها)



ياااااااااااه
كانت سنه طويله اوي !!!!!
بس فعلا حصلت فيها حاجات كتيييير وبلاوي اكتر
وبما اننا داخلين علي سنه مفترجه ان شاء الله
فلازم نبص للتاريخ الاسود القديم .....
علشان تبقي ذكري جميله لبعد العيد
( علي رأي صفاء ابو السعود !!!)


31/1/2010
مصر ترتدى تاج أفريقيا للمرة الثالثة على التوالى حسمها «جدو» الرائع..وجاب الكأس «السابع»





8/2/2010
أول مصافحة دبلوماسية بين أمير سعودى ومسؤول إسرائيلى بارز

10 / 4 / 2010
تحطم طائرة الرئيس البولندي .. ووفاة جميع الركاب بمافيهم الرئيس وزوجته

30 آخرين كانوا على متنها ..
 
31 – 5 -2010

مهاجمة الكيان الصهيوني على أسطول الحرية المنطلق من تركيا ..ومقتل أكثر من 15 شخص

وأسر 600 شخص .. من عدة دول مختلفة ..









11 /6 / 2010
افتتاح كأس العالم في جنوب أفريقيا ..
ولأول مره تقام هالتظاهرة العالمية في قارة أفريقيا ..
12 / 8 / 2010 م
انطلاق ساعة مكة المكرمة ,

يبلغ الارتفاع الإجمالي لبرج ساعة مكة 601 متر، في حين يصل ارتفاع الساعة من قاعدتها إلى أعلى نقطة في قمة الهلال 251 مترا. وتتكون من 4 واجهات ..
 
بصراحه بقيت الأحداث كانت شبه بعضها
زي الزلازل والبركان والفيضانات 
بس اخر حاجه حبيت احطها طبعا 
هو الخبر ده


2/12/2010

قطر تفوز بقرعة نتيجة كأس العالم 2022 وتصبح هى الدولة العربية الاولى المنظمة لكأس العالم , خبر سعيد جداً لكل عشاق الكرة العالمية والعربية.
بينما فازت روسيا بتنظيم كأس العالم 2018 .



طبعا بنبارك لاخواتنا الأشقاء الأحباب من بلدنا الحبيب
( روسيا)
علي فوزها بتنظيم كاس العالم عام 2018 
احم احم .... وطبعا بنبارك لقطر كمان يعني !!!
وعقبالنا ياااااااارب !!!!

مش بقولكم سنه عثل !!!!
يلا مش مشكله .... هابي نيو يير


تحياتي
بسنت نبيل
مدونة دو .. ري .. مي
عـــــــيــــــش الـــــــحـــــيــــــاه ..... مع 2010

الاثنين، 27 ديسمبر 2010

لقاء مميز .......


والأن ......
لقاءنا المميز في برنامجنا وبرنامجكم المفضل
Happy New Year Egypt
( برعاية مدونة دو .. ري .. مي )

لقاءنا اللي حكتلكم عليه 
واللي قلتلكم انه هيبقي لقاء مع شخص مختلف حبيتين لسببين 
اول سبب .... ان كل اللي عملت معاهم لقاءات
كانوا كلللهم بيجيبوا سيرة نفس الشخص ده
" حتي انا ... وهتعرفوا امتي دلوقتي"
مش هتكلم كتيييير
خلونا نشوف ايه اللي حصل في حلقتنا المميزه دي من البرنامج


انا : كنت عاوزه اعمل معاك حوار علي راس السنه علشان المدونه ماشي ؟؟؟

هو : اعملى

انا : عاوزاك تقولي افضل حاجه حصلتلك في عام 2010
وافضل حاجه حصلت لمصر بوجهة نظرك برضو في 2010

هو : احسن حاجة حصلتلى فى 2010 انى رجعت ثقة صديق ليا
اما بالنسبة لمصر فلا تزال انجازاتنا فى الانتخابات تضحك العالم من حولنا

انا ( ايه الكلام العجيب ده ؟) احم..... اوك
طب واوحش حاجه عالميا وليك ؟؟؟

هو : ان مدرس التنميه البشرية بتاعنا مشى
وحدوث زلازل هاييتى


( ومازال لم احد يتزكر الأزمه العالميه وانفلونزا الخنازير)

انا :  توقعاتك ايه ل2011 بأمانه؟؟؟

هو : لذيذة عشان ان شاء الله هروح الجامعة السنة الجاية وهخلص من الثانوية

انا : سؤال اخير
تتوقع مصر هتطلع كاس العالم 2014 ؟

هو : مليش فى الكورة
بس ان شاء الله
ربنا يسهل

انا : تحب تقول كلمه لحد في نهاية برنامجنا
ولو كنت متابع باسي قالتلك كلمه في المدونه
فلو عاوز ترد ... او تقول حاجه جديده
قول ....

هو: انا تقولى اتجوز ...انا بتاع جواز!!!
ماشى ....مش هية خفت
هنفخها
و احب اقول كلمتين.....الاولى
لكل فتاه محجبة نص كوم
اعملى شعرك موزمبليق او غطى القصة
بطلو استفزاز بقى .......تانى كلمة لبسمتى
حمد الله على السلامة ، ويارب تكونى بخير
وبصحة جيدة
عشان تتعجنى منى ......واخيرا
ولا مش اخيرا 

 
انا: ياعم اخلص

هو :  كلمة لسيلينا..... بعتينى عشان المسلسل ن6
وكلمة للبت اللى بتخرج ولا بتحاور دى
ابعدى عن بتنجانه
بت
مدونتك بتشغل الاغانى من نفسها

انا ( باستغراب)  ايوا ...فيها اغاني
يلا خلصت كلامك ؟

هو: لأ ..... شكرا ليا
عشان اقترحتلك اغانى نضيفة

انا( بغضب) يااااارب لو مكناش في برناااااامج
كمل كمل

هو : وارجو من القراء.... يدعولى بالشفاء من المرض العقلى
وانى الاقى بنت الحلال اللى تدلعنى
وتكون زى جان دى

 انا :ههههههه ياااارب..... كلمه تانيه ؟؟؟؟؟؟

هو : لأ خلاص ..... اه
انصح بمشاهدة الفتيان قبل الزهور
والابتعاد عن كاركتر جان دى وجون بيو ونونا

انا : انا نصحتهم قبلك ....ياعم امشي بقي
ايه الضيف الرغاي ده
يلا هابي نيو يير

هو : اللهى تتجوزى واحد
زى جي هيوو

انا : يااااااااااارب

هو: لو تعرفى اللى فيها ض3
يلا بالا باى
انا هنصرف

 انا :يلا بلاباي






يااااااااه ....... كان رغاي اوي
كل الناس كانوا بيقولوا جمله واحده وبس
الا ده ، قال كلام لمصر كلها ....
يلا مش مشكله

اتمني بس ان اللقاء يكون عجبكم
مش اللقاء ده بس ...
اتمني ان كل اللقاءات تكون عجبتكم 
وعلي فكره دي مش النهاية
انتظروني .... مع اللقاء الأخير 
تحياتي
بسنت نبيل
دو .. ري .. مي 
عــــــيـــــش الـــحــــياه .... مع 2011

الأحد، 26 ديسمبر 2010

تالت حلقه ..... Happy New Year Egypt



النهارده حلقتنا متميزه جدا
مش علشان انا بعملها مع ضيفه مميزه 
لأ ....
ده كمان علشان ارحب باللون الأحمر اللي هل علي المدونه
واللي من ضمن قائمة الواني المفضله
وقبل مابدأ حلقتنا النهارده 
اعرفكم باللي معانا النهارده
معانا عضوة رانمارو المتميزه
" او المشرفه الذاكره مش مساعداني حالياً "
( فيوليت)
الحوار كان مسجل وده اللي حصل بالظبط ......



انا :  اولا هابي نيو يير

هي :  تو يو توو ^^

انا :  بمناسبة ان السنه الجديده خلاص قربت تهل علينا .... ايه هي افضل حاجه حصلتلك في 2010 ؟

هي :  اني جبت تقدير جيد جداً في سنة أولى و دي تعتبر معجزة ^^"

انا :  طب ورايك افضل حاجه حصلت لمصر في 2010 ؟

هي :  امممم وقفة الناس في قضية خالد سعيد ،،

انا :  وانتي وقفتي معاهم ولا كنتي قاعده؟ ههههههه

هي : هههه لا أهلي كانوا مستعدين يقتلوني هُما لو كنت نزلت الوقفة الصامتة
 

 انا :ههههه طب وايه هي اوحش حاجه عالميا وليكي ؟؟؟؟

هي : أوحش حاجة طبعاً كان اللي حصل بين مصر و الجزائر ..
و بالنسبة ليا ..،، اننا مرينا بفترة أزمة مالية يعني 

و كانت الأمور مش مستقرة في البيت
بس الحمد لله عدت ^^

انا : طوويب الحمد لله توقعاتك ايه ل2011 بأمانه ؟؟؟؟

هي : بأمانة بالنسبة لمصر انها هتسوء أكتر بسبب الإنتخابات

و بالنسبة لي مش عارفة يمكن احتمال السنة دي أحقق حاجة مهمة 
، بس أعتقد انها هتبقى سنة كويسة يعني .و ربنا يستر

انا ( باستغراب)  اها سؤال اخير .....
تتوقعي مصر هتطلع كاس العالم 2014 ؟



( بعد انتظار طال لمدة 5 دقائق )


انا :  يااااه للدرجه سؤال صعب؟

هي :  انا ماليش في الكورة انا بتحايل على الناس حد يفهمني ..،، بس إن شاء الله .. الأمل مش بفلوس يعني

انا : عندك كلمه تقوليها لحد ؟

هي : اه طبعاً كلمة لداجر ..،،
ارحمني

 انا :ههههه عندك كلمه لحد تاني

هي : اممم لكل أعضاء رانمارو
أريجاتو

 انا : بس ؟؟ الواد لوشين قال لمصر كلها كلام
رغااااااااي جدا لازم طبعا في اخر الحلقه نشكرك
لانك كنتي ضيفه خفيفه علينا وياريت تتابعي مدونتي
دو .. ري .. مي ، وتشوفي لقاءك

هي: أكيد ان شاء الله


انا : يلا هابي نيو يير







 الغريبه ان محدش ذكر الأزمه الماليه خااااااالص عل العموم
مش مشكله ، خلونا نشوف ضيفنا الأخير معانا في حلقتنا الجايه
والصراحه ..... انا صممت يكون الأخير
لأني متأكده ان الحوار ده مش هيبقي عااااااادي 
ياريت كلكم تتابعوه ، لانكم اما هتتعقدوا .... اما هتتجننوا

Happy New Year



تحياتي
بسنت نبيل
مدونة دو .. ري .. مي 
عـــــــيش الــــــــــحيــــــاه ..... مع 2011 

الخميس، 23 ديسمبر 2010

تاني حلقه ..... Happy New Year Egypt



( المكان)
نفس الأستديو
(الأشخاص)
نفس المذيعه اللي هي انا 
مع ضيف مختلف ....
( وتبدأ الحلقه )
3
2
1
انا : هابي نيو يير عليك

هو :  وعليكي

انا : كل سنه وانت طيب 

هو : وانتي بخير دايما ^^

انا : هسألك سؤال .... ولازم اجابتك تكون مححده وصريحه ماشي ؟

هو : اوك :D

انا : ايه افضل حاجه حصلتلك في 2010 ؟

هو : مش فاكر الصراحه !!!!

انا ( بإحراج تام) : احم .... معلش حاول تفتكر !!!

هو : انى طلعت الثانى على المدرسة فى المسابقة الثقافية ض2
افتكرت حاجة اهو
انا :  طب وبالنسبه لوجهة نظرك ايه هي اوحش حاجه حصلت في 2010
عالميا وبالنسبه ليك ؟
هو :الاستفتاء بتاع جنوب السودان واللى حصل فى اسطول الحرية

انا : اها .... ياتري اي توقعاتك للسنه الجديده ؟

هو : احم بما انى متفائل قليلا فأتوقع سنة فيها حروب كتيرة شويتين
حرب بين ايران وامريكا وبين الكوريتين وبيننا وبين اثيوبيا
انا :  احم احم .... ياريت كلنا نبقي بنص تفاؤلك
سؤال اخير .... هل تعتقد ان مصر هتوصل لكاس العالم في 2014 ؟

هو : احم انا ماليش فى الكورة الحقيقة لكن خلينا متفألين شوية ونقول انها هتوصل بأذن الله

انا : برضو خلينا متفألين دي ؟؟؟ مفيش فايده 
هو : ماهو انا بقول هتوصل انا قلت حاجة !!!!!!
انا :  وفي نهاية حلقتنا نشكر ....... اسمك ايه يابني انت كمان
هو :  على او داجر او امينيم او جيرارد او السيد المبجل ض2
اختارى واحد بقى
انا : تحب تقول حاجه لحد في نهاية حلقتنا ؟
هو : لا الحقيقه انا متخانق مع كل الناس دلوقتي ...

انا : يارب دايما ..... يلا هابي نيو يير

هو : هابي نيو يير 


(انتهت الحلقه)
خلف الكواليس

انا : يلااااااااااا ....... ارموا الكائن ده مع اخته وهاتولي اللي بعده 
( هاتولي الولد من التلاجه !!!!!!!)



اول لقاء ....... Egypt Happy New Year




( المكان )
استديو عام مجهز باعلي التجهيزات والكاميرات
محيطه بالمكان 

( الأشخاص)
هناك كرسيان بينهما مائده كبيره يجلس 
علي احدهما المذيعه "اللي هي انا "
وعلي الكرسي الأخر 
الضيف ... المجهول
( ويبدأ الحوار كالأتي)

3
2
1
انا : هابي نيو يير

هي :  الكاميرا مظبوطه ؟؟

انا ( باستغراب) : احم .... اه مظبوطه ،عايزه اسألك سؤال وعايزه اجابتك تكون صحيحه ومباشره لأن برنامجنا برنامج الحقيقه الواضحه .... ماشي؟

هي :  اكيد 

انا : بالنسبه لوجهة نظرك ... ايه افضل حاجه حصلت في 2010 ؟

هي : عرفت اصحاب جداد تحفه بجدوعرفت اعتمد علي نفسي اكترده بالنسبالي يعني

انا :  طب وتفتكري ايه هي اوحش حاجه حصلت في 2010؟
هي : عالميا ولا بالنسبالي بردو ؟

انا :  الأثنين

هي : هي عالميا كل حاجه بقت تكرار لبعضها اصلا.... بالنسبالي خيانه حصلت

انا ( بعد مقلبت علي المحقق كونان ) : امممممم خيانه ماشي ماشي
ايه توقعاتك ياتري للسنه الجديده؟

هي : :D  لا ان شاء الله هتبقي حلوه عندي احساس انها هتبقي سنه جميله 
و هتتجوزي السنادي ان شاء الله بعيدا عن السامعين

انا :  ههههههههه قولي بس يارب

هي :  يارب ياتي ، تتجوزي لوشين ....

انا ( ممبحلقه باعلي صوتي ) : كااااااااااااااااااااااااااااات

يامونتاااااج
ديليت للحته دي
ركزي يامي ... مصر بتتفرج علينا تقوليلي لوشين
يلا علي الهوا تاني

هي : ههههههههه ماله لوش زي الفل
 ده حتي لطيف و لذيذ و رخمده لووووش
حد يزعل من لوش.....لا اله الا الله
( محسساني انه عبد مجيد الصحاح ياخي )
احم ونكمل اللقاء ( بعد مونتاج رهيب حصل )

انا : السؤال الأخير في حلقتنا النهارده ونودعك
هل تعتقدي ان مصر هتوصل لكاس العالم 2014 ؟
هي :  مفيش حاجه بعيده عن ربنا !!!! :D

انا : حسبي الله ونعمه الوكيل.... وفي نهاية حلقتنا بنشكر .... اسمك ايه ؟؟؟

هي : باثي 

انا (بعصبيه) : باثي ايه .... باثي نقط وانا اللي هكمل 

هي : باسي نايتشايد
انا : ياريتك مكملتي ... وفي نهاية حلقتنا تحبي تقولي كلمه لحد ؟ 
هي : اه هقول لحد هو عارف نفسه
بلاش غرووووووووور مش حلو
وهقول للوش صبح صبح لوشو
وهابي نيو يير
انا : يو تو 
 ( وبعد الأنتهاء)
من خلف الكواليس
انا : يلاااااااا ......... طلعوا الشئ ده برا وهاتولي الي بعده !!!!
هي : شئ !!!!! اضربك فييييييييييين ؟؟

( ويتم ختم اللقاء بسبب ماحدث منعا للأحراج)
وانتظرونا في برنامج هابي نيو يير يامصر 

عدوي المسلسلات الكوري .....



الحب قبل الخبز احياناً ( فيلم مصري)
الطعام قبل الزهور ( مثل ياباني)
الفتيان قبل الزهور ( مسلسل كوري)
 اشار بعض الأشخاص "بدون ذكر اسماء" ان المسلسلات الكوريه 
تخفض من نسبة الذكاء ......
علي رأي شويكار ( اتنييييل علي عيييييينك)
انتوا عارفيين المشكله في ايه ؟؟ 
ان المسلسلات الكوري حلوه !!!! 
( الصين حلوه .... لا مش حلوه!!!!)
 لو كانت وحشه كنت وافقت اللي قال الكلام ده 
في الحقيقه انا كنت كده في الأول ، لحد ماتفرجت علي مسلسل
اسمه " الفتيان قبل الزهور" 
بجد بجد بجد ....... مسلسل طللللقه
طبعا الفضول هيتغلغل فيك عزيزي القارئ علشان تسأل
اهو اهو .... باين في عنيييك 
انت اكيد عايز تسأل ..... اتفرجتي عليه ازاي وليه ؟
هقولك بص ياسيدي ، وربنا انا مكان في مخي اصلا اتفرج
انا كنت متأكده انهم هيبقوا شوية عيال شبه بعض 
عماليين يحبوا في بعض ومفيش اي حاجه في اي حاجه 
غير ملل ملل ملل
لحد منفس الشخص ( اللي دعينا له بالشفاء العقلي)
قالي اتفرجي علي حلقه من المسلسل ده ... 
 اتفرجت واستعجبت واستغربت واتحركت وحملت 
" حلوه القافيه صح ؟؟"
ايا كان .... حملت اول حلقه واكتشفت ان الحلقه
عباره عن اجزاء ، بدأت احمل واتابع واحط صور علي الفيس
ومن هنا بدأت رحلتي مع الكوري ......
ادعولي ماحبش الأغاني الكوووووري
بعنيهم الضيقه دي !!!!!
بس ملحوظه / الفتيان قبل الزهور .... حملوه وهتحبوه 
 " تاني قافيه .... حلوه صح"
تحياتي
بسنت نبيل
مدونة دو .. ري .. مي
عـــــــيــــــش الــــــحــــــياه

ليه انا مدون ..... يلا يلا قبل ميعقل ياجدعان واللي ميشتري يتنيل



يوم الخميس .... والليل عريس ..... يعني عيد ميلاد ابليس .... يعني الجري للمتاعيس
ايه اللي حصل بقي في يوم الخميس علشان ده كللله ؟
رجعت من المدرسه "بدري" جيت قعدت علي الجهاز وفتحت مدونة (رفايع)
لاقيت حد عاملي تاج علي ( استوبيان) اسمه ليه انا مدون ؟؟
المهم بصيت علي الأسئله لاقيتها حلوه
قلت علي بركة الله نجاوب .... ولو وقف سؤال انا معايا البرشام جاهز

- تعريف مختصر بالمدون :
  اسمي بين صحابي بيسو او بوسي ... ومابين المدرسين المرووشه .... انما اللي ان شاء الله هيتكتب في البطاقه
 هو بسنت نبيل ....طالبه مطحونه بسبب ملف الأنجاز في تالته اعدادي ....بحب اسمع الأجنبي دايما ومحبش العربي غير في اغاني محدده ، مش بحب السياسه او الكوره لأني بصراحه بحس انهم كلام فارغ ، بحب الأفلام الكوميدي والأغاني الميتال وهانا مونتانا
والمسلسلات الكوري وبحب الضحك والهزار .... وطبعاً بحب التدوين.
 مجنونة نت وفيس واي بادي ، مش بحب الكتب الكبيره ، بحب بس كتب اجاثا كريستي لاني دايما بحس فيها بعبطي 


2- مكانته العلمية والدراسية  التى وصل اليها والتى من خلالها يستطيع أن
 يقدم  خدماته للمجتمع
 هو الحقيقه موصلتش للمرحله دي لسه ... لأني في تالته اعدادي بس اللي قدرت اعمله اني اتفوق في دراستي علشان مجتمعي وبلدي



3- متى كانت البداية فى التدوين (بالتاريخ )؟
 في 19 اغسطس 2010




4- كيف كانت البداية فى التدوين ؟
 البدايه كانت في رمضان .... حيث كنت فاضيه رايقه مش لاقيه حاجه اعملها ، لحد ماختي قالتلي علي فكرة المدونات وان ازاي الواحد ممكن يكتب اللي هو عاوزه من غير قوانين ، الصراحه عجبتني الفكره ... في البدايه كنت بشق حاجه اسمها راب فخليت اسمها Rap VS Live
ولما لاقيت ان اسمها بيخلي مواضيعها محدوده غيرتها وخلتها دو ري مي .... وبعد كده قلبتها وخلتها Do .. Ra .. Mi وطبعا احترت هي مي ؟ بالـI ولا بالـA ؟؟؟؟؟


- ليه أنت مدونة ؟؟؟؟؟ وما هى طموحاتك فى هذا المجال 
وماذا تسعى له بموقعك
وإلى أى مدى تريد أن تصل فى التدوين ؟؟
انا مدونه لأني محتاجه التدوين ..... الواحد لما بيكون مخنوق او متضايق او غضبان لدرجه فظيعه بيبقي محتاج حاجه يفجر فيها غضبه ، هو ده بقي حالي مع التدوين ، بحس اني بطلع كل اللي عاوزاه في التدوين مفيش تفكير اللي في مخي بيطلع علي الكيبورد علي طول ، بالنسبه لطموحاتي فهي كبيره بتمني طبعا انها تبقي مشهور كمدونة " عاوزه اتجوز" او ابقي معروفه دايما بمدونتي دو ري مي 
ونفسي اوصل للتدوين لحد ...... بصراحه لحد مزهق ... او لحد مالاقيش اكتب حاجه اكتبها " وانا عارفه ان ده مستحيل"


تحياتي
بسنت نبيل 
مدونة دو .. ري .. مي
عـــــيـــــــش الـــــــــحـــــــــياه


الأربعاء، 22 ديسمبر 2010

Pain ... Break ياقلبي لا تحزن




Paaaaaain , Without Love
Paaain , I cant get enough
paaaain , i like it rough
Cuse i'd rather Feel pain Then nothing at all
ايه ده ؟؟ احنا علي الهوا !!!!!
مش حد يقولي بدل مانا بغني كده 
عل العموم اكيد حد هيسألني
كنتي بتغني ايه ؟؟
هقولكم اني خلاص بدأت استلطف الميتال
وللي ميعرفش الميتال فده تعريفه 
( الميتال : عباره عن نوع من الأغاني ملئ بالأزعاج !!!)
حد هيسألني ، مدام مزعج بتسمعيه ليه ؟؟
هقوله لأن بصراحه .. ازعاج لذيذ

في البدايه اعرفكم بصورة الفرقه اللي فوق دول
دي فرقة " 3 ايام شحم !!!!!"
اسمها بالأنجلش احلي
" Three Days Greace"

الصراحه انا مكنتش اعرف عنهم حاجه
لأنهم ببساطه بيغنوا " والله اعلم" ميتال
وده واحد زميلي ( ادعوله بالشفاء العقلي) 
هو اللي سمعهوملي
عل العموم لازم اشكره في الأول والأخر ... لأنه جابلي فكرة مدونه جديده
ايا كان .... سمعتلهم اغنية Break بجد طلعت دماااار
بعد كده اقترح عليا اسمع Pain ( اللي كنت بغنيها دي)
وبجد بجد ....... عجبتني الدوشه دي جدا جدا جدا 
مع ان السماعه كانت هتنفجر ... ودماغ اختي كمان كانت هتنفجر 
بس عجبني فيها الكلمات 

واكتشفت حاجه غريبه اوي ......
ان الميتال احيانا بيبقي هادف جدا 
فيه اغاني كانت بتحكي عن د.فاوست ( الرجل الذي باع نفسه للشيطان)
واغاني بتحكي عن صراع جاليليو ( والله اعلم مين ده؟؟!!)
واغاني عزفت الف ليله وليله بالجيتار
واغاني عملت معزوفة موزارت الشهيره 
يعني واضح انهم مفيدين 
بس من غير كلام بقي وحوارات وياويك كذا وياويك كذا
اسمعوا دول وادعوووولي
اتفرجوا كمان
Break

Pain


تحياتي
بسنت نبيل
مدونة دو .. ري .. مي
عـــــــيــــــــــش الــــــــحـــــــيـــــاه






الاثنين، 13 ديسمبر 2010

انا امي .......


اعرفكم بالولد اللي في الصوره
Declan
مغني صغيور جداً .... بيغني من ايام مكان عيل
ملحوظه / انا معرفوش غير النهارده :D
عرفتوا من علي الفيس
محدش يفهم غلط !!! .... كانوا حاطيين الفديو بتاع الأغنيه بتاعته
انا اعجبت بالولد ده جداً لسبب بسيط
( حد هيطلع من الأرض ويسألني .... ايه هو السبب !!!)
هقوله ... مهو لو صبر القاتل عل المقتول كان اتقتل لوحده !!!
السبب ، هو اغنيه عملها بس مميزه اوي
بيبين فعلا ان الأمهات دول حاجه عظيمه
فعلا تلاقيهم في وقت الضيق
( امي ست عظيمه عظيمه  عظيمه ..... اعظم عظمات الستات)

عزيزي القارئ ...  لو كنت موجود يعني !!!
ربما تجد الأمر سخيفاً 
ولربما هتروح لعلامة الأكس اللي فوق دي وتقفل
او لربما تقول ايه الكلام التيت ده 
في كل الحالات هقوله بكل هدوء ..... ربنا يسامحك 
( مش من قلبي خد بالك )
بس النصيحه اللي الأم قالتها هنا
  مش نصيحه عاديه ، دي نصيحه مودرن !!!!
وده بيبين الفرق بين امهات برا وامهات جوا  
( يلا ..... من برا لجوا ياقلبي لا تحزن !!)

مش هتكلم كتير ..... اصل الصراحه ايدي وجعتني
هخليكم تسمعوا الأغنيه بنفسكم

ملحوظه تانيه ( معلش المحلايظ كتير هنا )
لو سمعت صوت عيل بيغني ..... وربنا الواد ده معرفه ولا عمري شفته
بس هو اكيد هتسمع صوت عيل 
لأنه غناها وهو صغير جدا ... مش جدا اوي يعني

الأغنيه بكلمتها 



تحياتي
بسنت نبيل
مدونة دو .. ري .. مي
عـــــيــــــش الحـــــــيــــــاه

الأحد، 12 ديسمبر 2010

يامجمع الأحباب ياشتا !!!!!



ليله صفرا !!!!!
ليله غبرا !!!!!
ليله سقعه ، ليله بارده ، ليله عرضه
( والنبي حلوه الأغنيه )

ومع ان الشتا دخل .... وده واضح اوي يعني
حبيت ابينلكم احنا من قد اييييه !!!
واحنا بنغني للشتا ده ، حد هيسألني ازاي ؟؟؟
هقولك انا مش هرد عليك ، انا هخلي الأغاني ترد عليك 
وادي مثال بسيط



كنا في اواخر الشتا قبل اللي فاات
زي اليومين دول عشنا مع بعض حكايات
 انا كنت لما احب اتونس معاه 
انا كنت باخذ بعضي واروحلو من سكات 
والناس فى عز البرد يجرو ويستخبو 
وانا كنت بجري واخبي نفسي اوام في قلبو 
ولحد لما الليل يليل بابقا جنبو 
وافضل في عز البرد وياه بالساعات....









مقلتش حاجه انا !!!!
اينعم انا مش من معجبين اليسا بس الأغنيه واضح
انها عامله شغل كبير اوي مع الشباب وخصوصا في الأيام دي
ولو كنت عزيزي القارئ مش من معجبيها زيي
هديلك نوع تاني من الشتا 
هنا تجد اي شئ في اي شئ







وادى الشتا بطول ليليه ع الى فاته حبيبه
ياليل يابدر نسمه ياطير يازهر يااغصان
هاتولى الحبيب كلمه تواسى العشاق الحيران
اخذ ورد الهوى منى وفات لى شوكه يالمنى
ما اعرفش ايه ذنبى غير انى فى حبى اخلصت من قلبى
وغاب عنى لاكلمتنى ولا قال امتى راح اشوفه
واقول يمكن يرحمنى ويبعت فى الربيع طيفه
وادى الربيع عاد من تانى 




وإذا علمت اني مش من معجبيين فريد الأطرش برضو
فالأمر مش هيكون غريب ساعتها 
^_^
ولو كنت مش من معجبيين القديم ولا الجديد 
يبقي انت اكيد هتبقي من عشاق الكينج
لأن مفيش حد مبيحبش الكينج
( نفس النظام مع الأهلي .. لأن طبيعي مفيش حد زملكاوي)




بعد ما ادى وبعد ما خد بعد هد وبنى واحتد
شد لحاف الشتا من البرد
بعد ما لف وبعد ما دار بعد ما هدى وبعد ما ثار
بعد ما داب واشتاق واحتار
حط الدبلة وحط الساعة حط سجايرة والولاعة
علق حلمة على الشماعة
شد لحاف الشتا على جسمة
دحرج حلمة و همة واسمة
دارى عيون عايزين يبتسمو
الى قضى العمر هزار والى قضى العمر بجد
شد لحاف الشتا من البرد




ولو كنت من عشاق التمانينات _ تسعينات كده
يبقي برضو الشتا اكيد كان موجود ساعتها 
ومين ينسي ساعتها علي الحجار ؟؟؟



لما الشتا يدق البيبان
لما تناديني الذكريات
لما المطر يغسل شوارعنا القديمة والحارات
ألقاني جايلك فوق شفايفي بسمتي
كل الدروب التايهة تنده خطوتي
كل الليالي اللي في قمرها قلبي بات
مش جاي ألومك عاللي فات
ولاجاي أصحي الذكريات
لكني بأحتجلك ساعات
لما الشتا يدق البيبان



 للأسف ، المخزن اللي كان بيجبلي معلومات عن اغاني الشتا
فضي ... خلص اللي عنده
وبما ان ذاكرتي ضعيفه .... وذاكرته بدأت تضعف حاليا
فمش عارفيين نقول حاجه تانيه للشتا
( ومحدش يسأل ايه المخزن ده !!!)



تحياتي
بسنت نبيل
مدونة دو .. ري .. مي
عـــــيـــــش الحـــــــيــــــاه