إزاي ؟! ( تصدقوا معرفش )

إزاي ترضيلي حبيبتي
اتمعشق في اسمك وانتي
عمالة تزيدي في حيرتي
ومنتش حاسة بطيبتي ازاي
مش لاقي في عشقك دافع
ولاصدقى فى حبك شافع
ازاي انا رافع راسك
وانتي بتحني في راسي ازاي
انا اقدم شارع فيكى
وامالك من اللى ماليكى
انا طفل اتعلق بيكى
فى نص السكه وتوهتيه
انا لو عاشقك متخير
كان قلبى زمانه اتغير
وحياتك لفضل اغير فيكى لحد مترضى عليه
إزاي ترضيلي حبيبتي
اتمعشق في اسمك وانتي
عمالة تزيدي في حيرتي
ومنتش حاسة بطيبتي ازاي
مش لاقي في عشقك دافع
ولاصدقى فى حبك شافع
ازاي انا رافع راسك
وانتي بتحني في راسي ازاي
ازاى سايبانى بضعفى
طب ليه مش واقفه فى صفى
وانا عشت حياتى بحالها عشان ملمحش فى عينك خوف
وفى بحرك ولا فى برك ازاى احميلك ضهرك
وانا ضهرى فى اخر الليل دايما بيبات محنى ومكشوف
انا اقدم شارع فيكى
وامالك من اللى ماليكى
انا طفل اتعلق بيكى
فى نص السكه وتوهتيه
انا لو عاشقك متخير
كان قلبى زمانه اتغير
وحياتك لفضل اغير فيكى لحد مترضى عليه
إزاي ترضيلي حبيبتي
اتمعشق في اسمك وانتي
عمالة تزيدي في حيرتي
ومنتش حاسة بطيبتي ازاي
مش لاقي في عشقك دافع
ولاصدقى فى حبك شافع
ازاي انا رافع راسك
وانتي بتحني في راسي ازاي


محدش ينكر انها اغنيه جامده
صح ؟؟؟
بس زي مبيقولوا مفيش حاجه كامله
او الحلو ميكملش ..... 
لأن عزيزي القارئ مع انها اغنيه حلوه  الا انها بتتعرض
احياناً لهجوم غير مستلطف 
اراء الناس تعددت اوي في الموضوع ده 
" واحد هيطلع من الأرض دلوقتي ويسألني إزاي ؟ "
هقوله متستني شويه وانت هتعرف كفايه تصربع بقي

ناس قالوا ان محمد منير بيركب الموجه 
وناس قالوا محمد منير في اجزاء من الأغنيه كان صوته وحش فيها
وناس قالوا .... احنا كرهنا الأغنيه عشان فيها عتاب علي مصر 
 واحنا ناس مصريين والحاجات اللطشيفه دي 
( وناس قلوبها دهب ... وناس كلامها عجب )
احم احم ......


ولكل واحد بيقرأ دلوقتي التدونايه دي
اعرف انك بتقرأ كلام واحده من عشاق محمد منير
ومن عشاق الأغنيه دي 
ولو كنت كارهه ليها .... او كنت معارض ليها
او كنت وطني زياده عن اللزوم 
لا تؤاخذني .... فلولا اختلاف الأذواق لبارت السلع 


وانتظروني ف كل جديد × جديد
مع دو .. ري .. مي

تحياتي
بسنت نبيل
مدونة دو .. ري .. مي
عــــيــــش الحـيـــاه .... مع 25 يناير :D