وحوش مدينتنا ( من كتاب اعذريني .. ومخاوف اخري )

في مدينتنا نحن دوماً خائفون .. مذعورون ..

في مدينتنا لا نستطيع الخروج من بيوتنا في الصباح ،

في مدينتنا نحن دوماً ننتظر رحيلهم ،

في مدينتنا تأتي لنا الوحوش صباحاً ..!

تأتي لنا تلك الوحوش الشنيعه ، ولا نقول انها شنيعه إلا لأننا نعرف ماذا تفعل

كل صباح ...

لا يجرؤ احد علي مغادرة بيته ، نظل فيها ونراقبهم من كثب ..

في مدينتنا الرعب مستمر ، يكاد يكون بلا نهايه 

يُحكي انهم هدموا من قبل بيت واحد منا ، وأخذوه رغــماً عنه بلا شفقه!

تثير بعض الحكايات عنهم رعبنا فقط ، بينما البقيه تثير هلعنا التام ... !

أصبح الخوف هو الأساس .. هو المنطق .. هو المعقول ...

في مدينتنا لا احد يخرج من بيته إلا ليلاً ؛ لأنهم لا يأتون ليلاً

في مدينتنا .. نشعر بالهدوء والسكينه ليلاً ، بينما الترقب والفزع المحبوس صباحاً

تسألنا ...

ولِمَ لا نهجر مدينتنا ..؟؟

كَلا ... لقد فات الأوان ، ولن توجد ابداً فرصه للرحيل ..

يأتي الصباح ، ويأتون هم معه .. يصدرون ذلك النواح الغريب ..

بعضهم يقف محمقاً امام احد البيوت 

بعضهم يضع شيئاً ما امام بعض البيوت ..

ونرجوا ان يذهبوا يوماً ما ..

احياناً ينضم بعضهم الينا .. ولا نلبث ان نجده ينتمي الينا .. ويصبح واحد منا ..

في الليل ..

الليل يأتي بظلامه الذي يغطي علي كل شئ 

لا توجد مصابيح ضوء في مدينتنا ..

في الليل ...

نخرج نحن الاشباح لنلعب في مدينتنا ...

المقبره !!

اسماعيل خالد وهدان 

( ضمن مجموعة مواهب )

تحياتي

بسنت نبيل 

مدونة دو .. ري .. مي

حيث تصبح الحياه ... لحناً فرنسي الرنين

( بقي كل ده عل المسرح !! )

في يوم من ذوات الأيام ... كنت قاعده بتفرج علي التلفزيون

كسد فراغ وقتي يعني ليس اكتر !

لحد ملاقيت الفنان فريد الأطرش 

طالعلي كدا قدام الشاشه

هو والمرحومه ساميه جمال واسماعيل ياسين

وبيغنيلي " بساط الريح " 

( بساااط الريح حلو ومليح حلو يامحلاه بساط الريح بساط الريح )

وياسبحاااااااان الله 

الاقي علي حين غره !

البساط طاير في الجو !

" ياسلااااام .... طول عمرنا خيالنا واسع "

وياريت كان علي البساط وبس

إلا لاقتهم فجأه بيروحولي بغداد

( بلاد بغداد بلاد بغداد .... بلاد خيرات بلاد امجاد )

وشويه يروحوا تونس 

( ياتونس الخضراء ... خضرااااااء )

وحودوا علي بلاد الشام ... وفي الاخر يروحولي مصر !

كللل ده عزيزي القارئ

والاقيلك في النهايه الجمهور بيسقف !

هو كل ده كان علي المسرح اساساً .... 

بس طبعاً بعد كدا عرفت 

ان معظم افلام السينما القديمه 

كانت بنفس " التيبه "

ياسيدي بلاش دي !

اقل مثال تاني ...

محمد فوزي وتحيه كاريوكا 

في فيلم " حب وجنون "

كان في اسكتش في الفيلم

( اسمه مملكة الشياطين )

كان موضوعه ان الجن تحت الأرض

لهم شبيهم في الأنس ... وإن عشان الجن دول يتجوزا

لاازم البشر اللي شبههم يتجوزا برضو!

والأسكيتش كانت بتدور فكرته ان الجن دول بيحاولوا انهم يجمعوا

الاتنين البشريين دول علي بعض

بس المشكله ان شبية تحيه كاريوكا كانت فقيره

وشبيه محمد فوزي كان امير

مش هي دي المشكله سعادتك !

المشكله انهم كانوا عامليين الانس والجن 

وكللل ده ورا بعض ... 

ونذهل في اخر الاسكتش ... ان الشاشه اتقسمت نصين

كمشهد النهايه السعيد يعني ، النصين كانوا مقسمين كالأتي

نص فيه الأنس محمد فوزي وكاريوكا وهما واقفيين جنب بعض في الفرح

والنص اللي تحت فيه هما هما نفس الاتنين بس بخلفيه تانيه وهما جن !

وعشان يقنعونا ان ده مسرح !! ... جايبين الناس في الاخر وهما واقفيين وبيصقفوا في الصاله 

( وصباح الخير بليل بقي !! )

من العروض اللي المفروض انها تبقي مسرحيه

في السينما المصريه القديمه

الاستعراض اللي كان في فيلم ( النمر )

لنعيمه عاكف وانور وجدي 

نفاجأ عزيزي القارئ " زي كل مره يعني " 

بالعرض اللي عملته علي ( المسرح )

لما كانت عروسه والمفروض انها بتدور علي عريس ليها

وبتلف البلاااد ... وفي الأخر تختار المصري كالعاده

وسبحان الله .. نلاقيها راحت لباريس 

لتجد عريس باريسي ... مايص !

وتكلمه وترقص وتتشاور وتتحاور والغريبه ... انها نعيمه عاكف برضو !

بس عامله ولد علي المسرح ... ( معلش بنتنا برضو )

ونجدها بعد كدا تذهب الي شيكاغوا وبلاد الويست 

لتجد العريس الأخر لتتحاور وتتشاور وتتراقص معه برضو ... وبرضو يطلع نعيمه عاكف !

( مش مشكلللله .... هنعديها )

ونجدها بعد هذا تتوجه للبنان ... وتجد الرجل اللبناني

وبعض ميحصل كل اللي اتعودنا عليه ... برضو هو يكون نعيمه عاكف !

لحد مافي الأخر تروح لمصر وتحتفل مع المصريين بالعريس المصري اللي اخترته

عشان شهم وجدع وكل الحاجات اللطشيفه دي !

ححححح .... وبرررضو نجد الجمهور واقف وبيصقف 

" عاااااا .... عل المسرح ياكفره !! "

واخييييييراً .... مييين ميعرفش فيلم ( صغيره علي الحب )

لسندريلا الشاشه المصريه " سعاد حسني "

لكن برضو ! ... نتفاجأ بعرضها اللطيف اللي كان علي المسرح

بتاع " عم حزونبل "

بدايتها مع الاطفال وعم حزنبل 

متوجهه في غمضة عين ... الي عالم الكبار الوحشيين 

وف ثانيه " عل المسرح "

نجدها مع عمو البحاار ... اللي كان هيحكلها حكاية البلبل

( واللي كلنا كنا نفسها نعرف ايه هي القصه دي ! )

( بس عم حزونبل الرخم جه وقطعها ! )

طبعاً مش هما دول بس كل الاستعراضات 

اللي المفروض انها ( عل المسرح ! ) 

لا ده انت ياعزيزي القارئ ... هتلاقي من الهبل ده كتير اوي

مايكفي لجعل عقلك يشيط ويميض " حلوه يميض دي "

وهتلاقي علي لسانك كلمه واحده ... لو اتفرجت

علي اي من تلك العروض اللي حكتلك عليها دي ...

( بقي كل ده عل المسرح !! )

لكن للي مش متابع افلامنا القديمه 

او مش عارف بنتكلم علي ايه ... متسكتش علي حالك كدا 

باهديلك في مدونتي الحلوه .... (الـلأربعه الكبااار )

" متفتكرش ان هديك روايه انا هديك الاربع استعراضات دول "

" عشان تتفرج وتحكم بنفسك "

بسااط الريح لفريد الأطرش

استعراض مملكة الشياطين لفوزي وكاريوكا 

صغيره علي الحب

( ونعتذر عن عدم ايجاد استعراض نعيمه عاكف نظراً لأنه قديم فحت )

تحياتي 

بسنت نبيل

مدونة دو .. ري .. مي 

حيث تصبح الحياه .... لحناً فرنسي الرنين !

BE ... MR.HAPPY

Live ... Love ... Laugh 

( شعار Mr.happy )

الشعار ده عندنا خدناه بس عدلنا فيه كتير 

بقي شعارنا دلوقتي

( طنش ... تعش ... تنتعش )

كنت قاعده علي الفيس كعادتي اليوميه 

عشان اشوف اخر الاخبار واتسلي شويه يعني " كنوع من الهرب من المذاكره "

لاقيت منشور كدا لطيف خالص .... اول مقريته لاقيت الابتسامه علي وجهي اتسعت اوي 

طبعاً قلت " حاجه زي دي مينفعش تعدي من تحت الكيبورد بتاعي "

بيقولك ايه بقي ( Mr.Happy  المصري !! )

اشتري علبة شوكولاتة مستوردة غالية و كلها

بص على بنت حلوة و ...إعرف أنها لو عرفتك كويس أكيد هتحبك

إلعب لعبة مالعبتهاش من و إنت صغير

إعرق و إنهج و حس إنك عايش

إطفي نور أودتك شغل التكييف إسمع أكثر مزيكا بتحبها و إسرح معاها

بص لأهلك و عرفهم قد إيه بتحبهم

بص للي تحتك و إعرف قيمة كل حاجة معاك.
بص للي فوقيك و إعرف إن رغبتك إنك تبقى زيهم هي اللي مدية طعم لحياتك

إستمتع بشمس الصيف.. بصلها و قولها إنك مش كارهها.. حتى لو عرقتك و لزقتك

روح أقعد على البحر.. دخل رجليك في الرمل.. و خرجها.. بطل تفكير.. و إبدأ حس

في الشتا إنزل تحت البطانية و حط كوباية الشوكولاتة السخنة جمبك.. إبتسم و غمض عينيك و نام

إشتغل لحد ما تحس إنك مت.. نام ثاني و إشحن و روح موت نفسك ثاني.. وإعرف إنك زودت حاجة للدنيا ماحدش كان هيزودها غيرك

إعرف إنك كائن مهم و في كل لحظة بتغير إتجاه التاريخ

بص لشحات واقف جمبك.. ماتديلوش ولا نكلة.. بس سلم عليه و إضحكله و قوله عامل إيه؟ تمام؟

بص لبنت مغرورة و إضحك من جواك

بص لبنت وحشة و عاكسها بنظراتك و إعرف إنها هترجع البيت مبسوطة

بدون سبب إبعت رسالة لأي حد بتحبه قوله حاجة حلوة

خلى اللي يكره يكره و اللي يشتم يشتم وإعرف إنهم مضيعين وقتهم

إتأكد إنك لو عارف إنك هتموت بكرة هتعمل نفس اللي بتعمله دلوقت

حب جامد قوي حتى لو حبك مش هيستمر لحد بليل

كل أكلة حلوة قوي.. بس ماتخليهاش تشبعك

إشرب مشروب دخلت المطبخ و إخترعته و لو ماعجبكش إرميه في الحوض و إنزل إشرب حاجة ثانية بتحبها

ماتشربش شيشة أو سجاير.. إشرب الهوا.. إستمتع بيه.. مش هتعرف قيمته إلا لو خلوا الهوا بفلوس.. ساعتها هتستمع بيه كأنه سيجارة حشيش مغربي

بطل خمرة و مخدرات.. و إتعلم إزاي تستمتع بحتى أوحش الحاجات حوليك

أكسب نفسك و حب حد بيكرهك

إكسب نفسك ثاني و حب حد بتكرهه

إكسب نفسك ثاني و إنسى حد لسه بتحبه من غير ما تكرهه

إتفرج على ماتش كورة لفرقتين ماتعرفهمش و شجع واحد فيهم قوي.. قوي.. حتى لو كان بيلعب زي الزمالك.

إنزل شجع مع الزملكاوية لما يكسبوا.. حتى لو إنت مش زملكاوي

إقرا الكلام ده من غير ماتعلق عليه و لو مش عاجبك بطل قراية

شوف فيلم الكيف و ماتتفرجش على آخر ربع ساعة فيه

إتفرج على الناظر من أول ما بيظهر محمد سعد

لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم

إقرا كتاب عن موضوع معقد مانتاش فاهمة و بعدها إنزل مع صحابك.. هتتبسط قوي

جرب أكلة جديدة في مطعم فخم.. ثمنها يخرب بيتك.. و روح و إنت مبسوط.
شد مع عربية سيات

إلبس أحلى لبس عندك و إنزل إمشي في الشارع و إنت فارد ظهرك.. و ماتحطش إيديك في جيبك خليهم أحرار

إشتري ورد لواحدة تعرفها عادي.. و قولها أصلك زي أختي و بعزك قوي.. هتتجنن

إرقص حتى لو في أودتك و إنت قافلها بالمفتاح.. ممكن تغني كمان و إنت ماسك الفرشة على إنها ميكروفون

إفتكر قبل ما تنام كل الكلام الحلو اللي سمعت الناس بتقوله عنك

كل ما تلاقي حد بيحكي عن مشكلة دورله عن الجانب المشرق فيها.. مهما كانت عويصة.. طلعله فيها فوايد و باركله

كل ما حد يقولك إزيك عامل إيه؟ قوله الحمد لله مبسوط قوي.. قولها بسرعة من غير ماتفكر و إبتسم.. لوحدك هتتبسط فعل

شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا

فكر في الموت كويس.. و إعرف إنه لسة ماجاش و إعرف إنه قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما كان السبب

سافر حتة ماروحتهاش قبل كده.. صورها و صور نفسك فيها.. صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه وحشك

إستحمى في نص ساعة.. خلى المية تنزل على وشك و إسمع صوتها كويس

جيب لنفسك هدية و إستنى لحد عيد ميلادك و إديها لنفسك

جيب هدية لحد بتحبه من غير مناسبة.. و إديهاله في عدم إهتمام كأنك ماعملتش حاجة غريبة

إنزل من بيتك بشبشب و شورت من غير ماتسرح شعرك.. و إتأكد من جواك إنه عادي جدا.. أنا مش مهتم.. و خليك واثق من نفسك.
إشرب مية كثير

ماتغضبش مهما حصل

أشكر كل الناس بسبب و من غير سبب

لو حد إتريق عليك إضحك.. حتى لو من جواك بتضحك عليه

لو حد شتمك حط ده في تانك البنزين بتاعك علشان يبقى طاقة تحركك لقدام

لو الناس بعدت عنك إعرف لأنكم مش زي بعض.. لا هما وحشين و لا إنت وحش.. إنتم بس مش زي بعض.. و إتبسط إنك مش بتضيع وقتك معاهم

لو لقيت نفسك لوحدك شوية ده معناه إنك فريد و نادر من نوعك.. و مين في الدنيا يقول إن نوعك غلط أو وحش.. بس إنت تقدر تتأكد إن ده النوع المناسب ليك.. و إتبسط بيه.. و لو نفسك تغيره غيره.. مافيش حاجة بتلزق حتى إسمك و دينك

بص لإمبارح.. و شوف إتعلمت منه قد إيه

خطط لبكره بس إوعى تخاف منه .. إزاي تخاف من حاجة إنت اللي بتبنيها أصلا.. حاجة لسة ماحصلتش و ماحدش في الدنيا يقدر يعرف إيه اللي هيحصل فيها

إستمتع بالنهاردة كويس.. لأن كل نهاردة هيبقى إمبارح بتاع بكرة زي ما كان بكرة بتاع إمبارح

إسمع أغنية مدحت صالح وانا ويايا بعيش زي المليونيرات و شوفها على اليو تيوب و إضحك منها أو عليها.. بس في الحالتين هتضحك

لما حد يحكيلك حاجة مملة علشان يبين مواهبه في الحياة إعمل نفسك متهم آخر حاجة و لما يخلص إعمل نفسك منبهر آخر حاجة برضه.. و كمان إسأله عن تكملة الحكاية.. بس ماتعملش كده كثير.. مرة كل فين و فين

إفتكر أيام لما كنت بتصحى بدري علشان المدرسة.. و لما كنت بتذاكر فيزيا أو تاريخ.. و أهلك مانعينك من النزول و إتبسط إن ده كله خلص و مش راجع ثاني

انا اراهنك ... انك بتبتسم دلوقتي

مهو لو مبتسمتش علي اي حاجه من دي

ابقي انا فشلت

فشلت ؟؟؟

انا فشلت عاااااااااااااا 

تحياتي

بسنت نبيل

مدونة دو .. ري .. مي

عندما تصبح الحياه .... لحناً فرنسي الرنين

اللقاء الأخير ...... مختلف جدا

والأن....

مع لقاءنا الأخير ، اللقاء اللي من وجهة نظري

كان الطف لقاء انا عملته ... لأني عملته مع شخص "عاقل شويه"

 اللقاء ده انا حطيته علشان عجبني ، مع اني كنت ممكن محطوش

( اه انا حره في حاجه !!!!!)

المهم ... الحوار عملناه في الأستديو

علشان الضيف ميخدش عننا وجهة نظر وحشه 

انا: جاهز

هو: احم احم ..... يلا

انا: هدوء في الاستديووووووووو...... احم احم يلا

هو: ايواا معاااكى !!

انا: قبل منبدأ طبعا برنامجنا لازم نقول كلمتنا المشهوره
لكل اللي بيشرفونا في برنامجنا هابي نيو يير يازيكو

هو: احم..... انتى بالصحه والسلامه

انا: قولي برايك كده .... ايه افضل حاجه حصلت لمصر عام 2010 ؟

هو: اممممم طبعا تحقيقها للرقم القياسى وحصولها على كأس افريقيا السابعه لتالت مره ع التواااالى

انا : اها ...... طب واحسن حاجه حصلتلك في 2010 ؟؟؟؟

هو : احسن حاجه حصلتلى .. السؤال دا اجبارى ^^" ؟

 اصلها مكانتش سنه حلوه اوى يعنى

انا: احم احم ...... ده بعد اذنك يعني مفيش اي حاجه خالص يعني ؟
معرفتش حب جديد ..... مشفتش حاجه لاول مره ....
انا بغششك يعني المفروض تجاوب بسرعه

هو: طيب يب حب جديد حب جديد 

 يابنتى انا عارف بس بختبرك

انا: ههههه ربنا يستر علينا
طب السؤال الاسهل بقي ايه هي اوحش حاجه حصلت لمصر عام 2010؟
ولو انت زكي (زي اسمك) هتقول الاجابه اللي انا مستنياها

هو: اكيييد طبعااااااا .. انها طلعت من تصفيات كاس العالم بجنوب افريقيا 

هاتولى منديل هاتولى منديل 

انا: معندناش ......الاستديو مفيهوش منديل

هو: اخر مره اجى برامج غلبانه كدا 

يعنى امسح ف كمى يعنى 

انا: يكون احسن بس ورا الكاميرا
متكسفوناش بقي
انا: احم احم .... نكمل

هو: احم يستحسنض2
 
انا: ايه هي اوحش حاجه حصلتلك في 2010
 حصلتلك انت.... انت، انت انت ولا انتش داري 
ههههههه.... احم احم.... جاوب جاوب

هو: مزيعه من شارع محمد على ض5 

انا: ههههههههههههه

هو: طيب احم .. انى لسه ف سنه اولى ف الجامعه دى اوحش حاجه

انا: طووويب.... السؤال الاشهره شهره توقعاتك لسنة 2011 باماااانه 

هو: اتوقع حروب اكتر وبلاوى اكتر واتوقع جمال رئيس مصر يعنى مصر هتفضل تعمل مفاوضات تهدئه والجو دا ومفيش جدييد  
انتى نمتى ولا ايه ؟؟؟؟

انا: لا بستغفر ربنا

هو: هههههههههههههههههههه
 
انا: سؤالنا الاخير وبما انك كروي اوي 
هتجاوبني عليه

هو: ايه كروى اوى دى وشى مدور يعنى ؟؟؟
 
انا: تتوقع مصر تطلع كاس العالم 2014 ؟
 كروي يعني غاوي كوره

هو: طووويب  
اممممممم يب ان شاء الله مصر هتطلع كاس العالم بسهوله جدا .. ياماما احنا التاسع ع العالم فووقوو بأى عاوزين حبه ثقه ف المنتخب مش كدااا

انا: وانا مالي ياعم هما اللي جايبين الاسئله
طيب ..... عندك كلمه اخيره تقولها لحد؟؟؟
اي حد

هو: حد شخصى يعنى ولا حد مين بالظبط 
 
انا: ايييي حد

هو: حددو اسألتكو بأى

انا: انتوا اللي افهموا بقي انا عمري ماستضفت حد كده قبل كده

هو: طيب احب اقول للريس ربنا يديك طوله العمر ياريس واهديولو بيت شعر قاله الزعيم عادل امام " هشتكنا وبشتكنا ياريس .. دانتا رئيس والنعمه كويس "
انا: هههههههههههههه

انا: طب وحد شخصي
الواد لوشين قال للمنتدي كله

هو: اممممم احب اقول للوشيين 
" يابنى كفايه كورى مش كويس على شانك تحسى انه بأى شبههم

انا: ههههههههه.....ياراجل هما الكوريين بعجروا اوي كدا؟؟

هو: هههههههههههههه لا لا ماهو مش شبههم اوى يعنى 

 بس عارفه يعنى نفس ستايل الشعر العظيم دا

 يللا بأى كفايه كداا 

انا: ياريت برضوعلشان معاد برنامجنا خلص يلا هابي نيو يير
يعني كل سنه وانت طيب

هو: وانتى بالصحه والسلامه وعقبال عيد العمال كدا ....
 
انا(بصدمه): عيد العمال ؟؟؟!!!!
 كاااااااااااااااااااااااااااااات

واحب اقلكم الكلمه المشهوره

" هو ده مسك الختام "

بس الكلمه التانيه المشهوره

" Happy New Year Egypt "

واتمني يكون اللقاء عجبكم وكل اللقاءات اللي فاتت 

برضو تكون نفس النظام ....

وانتظروني مع كل جديد وجديد

في عام 2011

مع مدونة دو .. ري .. مي 

 ***********************

عزيزي القارئ 

هذا اللقاء كان معمول من قبل مسنة 2011

تهل علينا بحلوها ومرها

" او في الظروف دي اقدر اقول مرها بس "

ويبدو ان زميلي اللي تنبأ باللي هيحصل

كان محق ساعتها ،،، كنت فاكره انه متشاؤم

بس طلع عنده بعد نظر لا اكثر ولا اقل !

احنا مقدمناش غير اننا ندعي 

ان السنه دي تتنيل وتخلص بقي

عشان بجد بجد يا2011 

احنا تعبنا منك اوي اوي !!!

تحياتي

بسنت نبيل

مدونة دو .. ري .. مي

عـــــيـــــش الــــــحــــــيــــاه ....بس !

imagine ... تخيل × 3 + 1

 you may say I'm a dreamer
But I'm not the only one
I hope someday you will join us
And the world will be as one

طبعاً طبعاً ،،، كلنا عارفين الـ"Beatles"

وللي ميعرفهوش 

فالبيتلز عندنا في مصر يعني " الخنافس "

مش تلاقي حد كدا يقولك العيل ده " خنفس " اوي 

اهو هما دول الخنافس

فرقه ظهروا في الستينات ،، 

اشتهروا باغنيهم " المزعجه " وشعرهم الطويل

ساعتها الناس لما كانوا في وسط الفن الراقي ،، ولقوا شوية شباب بيغنوا بالجيتار

ويغنوا حاجات دوشه ، اعجبوا بيهم علي طول

ساعتها طلع في العالم حاجه اسمها " the Beatles mania "

( جنون البيتلز )

الناس بدأت تطول شعرهم زيهم ويلبسوا زيهم ويغنوا اغانيهم 

لحد مالزمن بقي عمل عمايله ....

ده ياسيدي كان تعريف البيتلز في البدايه معني كده اننا لسه بنقول ياهادي

ومعلومه علي الطاير

مغني الاغنيه دي " اتقتل " بسبب سطر واحد قاله في الأغنيه 

imagine there's no countries
It isn't hard to do
Nothing to kill or die for
And no religion, too

 واحد متدين متعصب شويه سمع الجزء ده راح قتله ... المهم يعني 

لاقيت اختي من فتره كل شويه تتدندن الاغنيه دي 

وتشغلها وتقعد تغنيهالي بعلو صوتها 

وتفاجأت انا لما لاقيتها علي قناة " سينما 1 " في الاعلانات 

عرفت ساعتها ان دي اغنيه معروفه ، وبيني وبينكم لما ركزت لاقيت يعني لحنها حلو

رايقه وحلوه ،،، رحت وسلمت امري لله .. وسألت اختي

حكتلي بقي هي كل الليله اللي قلتلكم عليها دي 

بعدها بيومين وسبحاااان الله

لاقيت صحابي علي " الفيس " حاطيين الاغنيه 

بس بصوت ولد مغني اسمه " ديكلن " 

طفل مغني صوته حلو ،، بس صوته عيالي اوي 

بعدها باسبوع ولا حاجه اكشتفت ان الاغنيه دي طلعالي في البخت 

قلبت ونخورت و " تراراراااا "

اكتشفت ان " مادونا " غنتها برضو ... معني كدا ان لحد دلوقتي في 3 بيغنوها 

وجيت ادور عليهم عشان احطهم ،، لاقيت افريل لافين بتغنيها 

( اوكازيون imagine ،، بقوا 4 بيغنوا )

ولما سمعت الأربعه ورا بعض اكتشفت تلك الاختلافات العجييييبه !!!

وللي ميعرفش الاغنيه اصلا ... اهم هما الأربعه اسمع اللي انت عاوزه 

المغني الاصلي 

" ديكلن "

مادونا 

افريل لافين

اولا ديكلن : ديكلن اولا صوته طفولي اوي ،، يمكن دي كانت اكبر عقبه في سماعي لأغنيته ،، ولما قلت لصحابي كدا قالولي ان ديكلن بيغني باحساس اكبر ، بينما لم اشعر انا بهذا .... لا انكر ان الاغنيه لما غناها طلعت حلو بس !! .... عيل في الاول وفي الاخر ياجماعه 

ثانياً مادونا : مادووونااا .... ومين يقدر يقف قدامها ؟؟ 

في الحقيقه كنت بحبها لما كانت في حالها ،، لما غنت الاغنيه دي بجد بجد قفلتني منها ،الاغنيه ماشيه في حته وهي في حته تانيه خاالص ، الكلمات نفسها ، بس مادونا ماشيه في اللحن بسكه تانيه خالص ... صوتها لم يكن بمقدورها يعني عشان كدا اوي تعليق طلع مني " اغنية ايه دي ؟؟ "

افريل لافين : بصراحه .... انا اه مش بحب افريل بحس انها اوفر او فيها حاجه غلط بس بجد هي تفوقت علي نفسها في الاغنيه دي ، واعتبرها هي احسن واحده تغني اغنية " imagine " بعد جون لينون .... اهنيكي افريل " you are the Best"

عزيزي قارئ المدونه 

مش دول بس اللي غنوا الأغنيه ،،

دول غنوها بالتركي وناس كتير اوي غنوها ،،

ولو مكنتش سمعتها !!

فدي تبقي فرصتك الذهبيه ..... 

اتمني تكون الاغنيه عجبتك 

تحياتي 

بسنت نبيل 

مدونة دو .. ري .. مي

حيث تصبح الحياه ،،، لحناً فرنسي الرنين

سكوووت ... هنصدع !!

من اقوالنا المشهوره عند رؤيتنا لشئ مؤلم او صعب

او عند سماع نكته بايخه او عند رؤية شئ ظالم 

" دي الرحمه حلوه ... ! "

هذه الكلمه لا تقال فقط في تلك المواقف " البسيطه "

اللي ممكن اي حد يتعرضلها 

انما تقال عندما تتعرض اذنك ،،،

لنوع من الموسيقا ... غريب مريب شويه !

يدعي " الميتال "

اتكلمنا عن الميتال قبل كدا 

وابديت اعجابي بيه قبل كدا ..... لكن 

" give me a break come on "

الرحمه حلوه ... مش كل الميتال حلو

مش كل الميتال تحفه ،،،،

 في حاجات بتقلش وترخم وترذل معاك 

وانا لما لاقيت الاغنيه رخمت ورذلت معايا

قررت ارخم وارذل عليها ،،، واقول رايي وبدون خوف 

" ايييه الصداع ده ؟؟؟!!! "

عزيزي القارئ 

هتعتبرني جاحده علي الميتال .....

او هتعتبرني جريئه سنه علي قولي لذلك الكلام علناً

وربما مش هتعتبر اي حاجه خالص وتسأل سؤال برئ

" اغنية ايه دي اللي انتي عامله عليها الوشش ده كله ؟؟ "

قبل مابدأ اي كلام عليها لازم تسمعوها " او تشوفوا الكليب "

Helena
الكلمات ... هتحتاجوها فعلا !

في البدايه تعليقي علي الكليب .....

اولا مرعب حبتين 

ثانيا فكرته اه حلوه ،،،،، بس مرعب برضو

تقدر تقول كان ممكن يتعمل ف اي حته تاني ، غير الجنازه !

" لو كسلت تتفرج عل الفديو ... يبقي ايوااا هما بيغنوا ف جنازه "

غير اسم الاغنيه بيني وبينكم يعني يدل علي معناها

هيلينا ؟؟

شيلوا كدا الـ"ينا" .... هتلاقوها ( Hell )

غير الكلمات والمزيكا واستايل الغنا نفسه 

تركيبه مش طبيعيه 

لا انكر انني قليلا ماعجبت بها ،،، لكنها فعلا صداع

مقارنه باي اغنيه من " نوعها " برضو !!!

طبعاً انا عمري مكنت انانيه يعني او بحكم لوحدي

انا روحت لكل واحده من فصل ( 4/3 ) 

وسمعتها الأغنيه ،،، وخليتهم هما اللي يحكموا 

لاني طول عمري بحب الديمقراطيه

" مع العلم ان مفيش غير 3 بنات بيفهموا انجلش اصلاً "

النص الأول قعد يضحك ويتريق ( وده رد فعل طبيعي )

النص التاني فضل متنح ويبصولي علي اني مجنونه ( وده طبيعي عن اللي قبله )

التلاته بقي التانيين رموا السماعات وقالوا ( ايه الصداع ده ! )

حد يسمع الصداع ده ... ويسيب سيلين ديون والناس المحترمه دي !!

" من الاخر خدت تريقه الي اللانهائيه ... وما بعدها علي رأي باظ يطير "

( اه صحيح هو ابو باظ كان اسمه يطير ولا ده اللقب بتاعه ؟ )

ايا كان هنتجاهل السطر اللي فات ده !!!

انا بس بقولكم ان ودان الناس مش بتستحمل

في ناس كدا وناس كدا .... انت بقي ايها القارئ العزيز ؟

من الناس اللي كدا ولا الناس اللي كدا ؟ 

( من الاخر معانا ولا مع الناس التانيين ؟؟ )

تحياتي

بسنت نبيل

مدونة دو .. ري .. مي

حيث تصبح الحياه ...... سيمفونيه