كٌــــل شـــئ لـــلـــبــــيــــع !

هَلموا يابَشر 

هَلموا ياقوم ... لدينا كُل شَئ ! 

لَدينا كُل ماتُريده نَفسك ، لدينا كُل ماتتمناه عَيناك 

لدينا قُلوب للبَيع ، لدينا ارواح للبَيع

لدينا عُقول ، لَدينا شَرفٌ للبيع 

كُل شَئ للبَيع ... كُل شَئ للبيع 

لَدينا الكرامه ، ولَدينا الحظوظ .. ولدينا الإحترام للبَيع

لا تتعجبوا .. لا تتعَجب ياهذا ، لا تَتعجبي ياهذه !

فَكُل شئٍ يباع الأن 

كُل شئٍ يباع

هيا هلموا دون صراع 

هَلموا قبل الضياع ، هلموا فهنا جَميع الأشياء للبيع

هَلموا فلدينا جميع الأذواق 

مفاجأه لمعدومي المشاعر ، لدينا جميع انواع المشاعِر 

لدينا الحُب ، لدينا الإخلاص ، لدينا الكُره ، ولدينا الأمل 

لدينا كُل شئ

لا تتزاحموا ، ولا تتدافعوا 

هيا هيا لدينا الكثير من تلك الأمور ، لدينا ايضاً كلماتٌ بين السطور

هلموا ...

ولكن تذكروا !

بضاعتنا ليست بحقيقيه 

بضاعتنا نسخه من صوره اصليه !

لا تيأس إذا وجدت حباً مكسوراً

او قلباً مجروحاً

او كرهاً ممزوجاً بالأنانيه

او عقلٌ يشوبه السطحيه !

او وجدت احلاماً ... ليست بورديه !

لا تيأس إذا وجدت شرفٌ ملوث 

او وجدت لدينا كلمات ... مليئه بالرجعيه !

فتذكروا ...

بضاعتنا ، ليست إلا نسخه من صوره اصليه ، بضاعتنا ليست بحقيقيه !

فهيا هلموا ... هلموا ياقوم

فكُل شئ للبيع ، كُل شئ للبيع !

تحياتي

بسنت نبيل

اللعنه عليكي ايتها الثانويه !

اختي : احمدي ربنا إنك عديتي ...  سيبك منهم !

أنا : يابنتي انا مش وضيعه !

------- حوار اخر -------

ماما : المهم انك عديتي ، خلاص سيبك منهم !

أنا : انا هقولك زي مقولت لأختي ... ياماما انا مش وضيييعه !

وهكذا كان يومي أيها الساده الكرام ، في أقناع أهلي اني مش وضيعه !

أحم ، طبعاً انتوا اكيد دلوقتي مش فاهميين حاجه من اللي بقولها حالياً 

علي العموم خلوني أشرحلكم بهدوء

الموضوع بدأ ييجي من قيمة اسبوع !

عندما اتصلت بيا والدتي العزيزه ، واتحفتني بخبر إن تنسيق دخول الثانويه العامه

من 231 ! ( مئتان وواحد وثلاثون )

وللي مش مقدر خطورة الموقف ، فدا أعلي تنسيق حصل في تاريخ الثانويه العامه كله !

لَكن ده كان المتوقع من حكومتنا العزيزه ، اللي قالولنا قبل كدا إن علشان الثوره 

التنسيق هيبقي قلييييييل ، وفي مستوي الطالب الأقل من الضعيف !

( هع ! )

المهم يعني ، اخدنا احنا طلاب تالته اعدادي البومبه 

ولبسنا في مجموع التنسيق دا ، وطبعاً في الثانويه العامه .. لازم يبقي في تضحيات

وافاجأ انا بسنت نبيل ! ... ان أكتر من ربع الفصل معايا 

وقعوا مني ، وراحوا لـ(أستغفر الله العظيم يارب) ، التجاره ! 

واجبي كصديقه للجميع ، اني أعمل اي حاجه !

أي حاجه ... دا حتي لا اله إلا الله ياجدع !

ولكن ، وَقفت دقيقه حداد مع نفسي ، أفكر واجيبها شمااال ويميين

ومش لاقيه اي حاجه اعملها ، طب اتصل بيهم 

( اختي : تتصلي بيهم تقوليلهم ايه ؟ )
( احمدي ربنا إنك عديتي ... سيبك منهم ! )

( انا : يابنتي انا مش وضيييعه ! )

وهكذا عزيزي القارئ ، أعتقد ان الرؤيه أتضحت ليك !

ولو مش اتضحت ولاقيت نفسك تُهت في نص الكلام

( فأبقي كدا أنجزت مهمتي ! )

لَكن ، انا حسه اني بحقد علي صحابي اللي وقعوا مني

اهو اهو ... انا شايفاه اهو " السؤال بيتنطط في عنيييك عزيزي القارئ "

هتقولي بتحقدي عليهم ليه ؟

هقولك ببساطه ... استريحوا اووووووي !

انا النهارده بس خدت كورس مكثف في الثانويه العامه وكيفية ممارستها

خلاني أعيط " حرفياً " لمدة 10 ثواني !

ايييييه الذللللل دااا ! 

لما الواحد يروح المدرسه ، ويخرج علي الدروس ، ويرجع هلكان وتعبان متأخر

ويقعد يذااكر اللي خده واللي مخدوش ، ويقعد يحل في الواجبات 

دا يبقي ايه دا ؟ .... هتقولي الواحد لازم يتعب

( هقولك ماشي هو انا قُلت حاجه انا بفضفض بس ! )

هتتهمني بالكسل وأني عاوزه اسلك الطريق السهل واصبح في المستقبل ست بيت ملهاش مؤهل ، وتتهمني بالقصور الذهني زي ماختي اتهمتني !

( هقولك وربنا كُنت بفضفض بس مقُلتش حاااجه ! )

المشكله اني مطلوب مني احدد مستقبلي دلوقتي وحالاً وفوراً 

وكأني هطلع كليه بعد بكره الضهر ! 

وأساساً بعد مسمعت كورس الثانويه دا ، بصيت للمستقبل شويه كدا

وكان تعليقي زي تعليق سمير غانم في المتزوجون

( مين طفا النور ؟ )

اسووووود ، مستقبل اسود ومهبب وملوش ملامح 

لذلك فأنا فقط ، متفائله هههههه :D

هححح .... ولسه عزيزي القارئ ، لسه هشوف انا ايام سودا :D

معلش تعقيب صغير / علشان مبقاش " وضيعه "  

حكومتنا الحلوه الحلوه ، قررت إنها تُشفق علينا ، وتنزل مجموع التنسيق شويه

وخلوه 229 ( مئتان وتسعه وعشرون ! )

ياااااااااااه وليه الكرم دا :D

أه وحاجه تانيه ياجماعه معلش

ياريت محدش يسألني عن مجموعي علشان علي رأي اختي

( احمدي ربنا انك عديتي )

احم ، الرؤيه اتضحت صح ؟

طوويب الحمد لله

دلوقتي اقدر اقفل التدوينه وانا مطمنه !

وإلي اللقاء في تدوينه أخري

(( بس هتكون فنيه المره دي ))

تحياتي

بسنت نبيل

مدونة دو .. ري .. مي

تصاميمي الحلوه ..... ياتصاميمي

وبعد ان انتقلنا من مايلي سايروس " المنحرفه "

هننتقل ناو لواحده قطعت السمكه وديلها ، سيلينا جوميز

مفيش حد ي مال وسط المغنيين مش مشيت معاه

بس برضو ياجماعه البت مزه !

احم ، اياً كان ... تصميمي التاني لسلينا جوميز ، والشرح المفصل له

1 ) اول حاجه وضعت صوره بحجم 500 × 300 وهي خلفية بحر علشان تليق علي موضوع الموضوع

2 ) جبت صوره لسيلينا ... اللي علي الجانب الشمال ، وفرغتها ومحطتش عليها اي تأثير

وصغرت حجمها شويه علشان تليق

3 ) ركبت الستامب بتاع الصورتين اللي علي الجانب اليميني وفرغتهم كويس اوي !

4 ) ركبت صورتين لسلينا ، وحطيت امشون عليهم بحيث مش اخليهم ساده كدا !

5 ) الصوره كملت ، قررت اغير استايل الخلفيه ، وخليتها ملغفشه برضو

ححح وبس ياسيدي ... وراحت مصوته ، ورفعتها علي الفيس وخدت 7 لايك وكومنتات كتشييير

والتصاميم شوووور لسه مخلصتش ، ومتتخنقش عزيزي القارئ ، المواضيع كتيير

وملحوظه / الأسم اللي مكتوب ده " هيرا " ودي اكتر شخصيه في الوجود لذلك بحبها

تحياتي

بسنت نبيل

مدونة دو .. ري .. مي

حيث تصبح الحياه ... لحناً فرنسي الرنين !

انا مصممه ... مصممه اوي !

هابي شهر عليك عزيزي القارئ ...

وتم بحمد لله انتهاء هذا الشهر المزعج الطويل الذي يسمي بشهر ( مايو )

حصت فيه حاجات كتيير بس مش هنذكرها لأن ده مش موضوعنا طبعاً

توداي اول يوم في حملة المدونين ( انا هدون كل يوم ) ابتداءاً من النهارده 1/6 لحد 1/7

وعلشان تبقي بدايتها مسك ،، قررت انشر واخيراً مجموعة تصاميم من عمل العبد لله " اللي هو انا "

اول تصميم النهارده للمطربه " مايلي سايروس " وللي ميعرفهاش فهي مغنية بوب عندها 18 سنه

اشتهرت بشخصية " هانا مونتانا " ، بس الزمن دحدر حالها وبقت بايظه ( ومش هقول انحرفت عشان عيب عليا )

وبما اني من معجبيها قررت اني منسهاش واعملها التصميم اللي فوق ده !

وطبعاً عشان الرؤيه تتضح ، فانا احب اشرح عملت ايه بالظبط للوصول لعمل تلك الصوره 

1 ) عملت صفحه جديده باللون الأبيض مقاسها 500 × 300 وده مقاس كل تصميماتي 

2 ) ملقتش خلفيه تليق للموضوع فقررت ان استخدم خاصيه في الفوتو وهي عمل ضي الألوان 

واخترت اللون الاخضر ولونت الصفحه كلها مع التحفظ علي عمل بعض الخطوط لأضافة جو للخلفيه

3 ) بعد مانتهيت من عمل الخلفيه ، قررت ابدأ بوضع الصور 

4 ) حطيت اول صوره علي الخلفيه وفرغتها ، ومصغرتش ف حجمها لأني كنت محتاجه كبرها كدا

بحيث ان كأن معمول ZOOM IN علي وشها ، بس هو مش كدا ! .. المهم فرغتها وخليتها شفافه بدرجة 20 %

 

5 ) فرغت الصوره دي برضو من الجناب وحطتها في الجهه الشمال من الصوره ، مخلتهاش شفافه لاني حبيت درجتها كدا !

6 ) الصوره دي برضو استخدمت طريقة " حطها وخلاص " .. اتزنقت في الصور فحطتها ـ تفريغها نوعاً ما كان صعب

لكن في النهايه برضو حطتها علي اليمين

7 ) اكتملت ابعاد الصوره فاستخدمت اللاير .. علشان احط الصورتين علي الصوره اللي ف النص 

8 ) استخدمت خاصية اسكتش وخليت الصوره ملغفشه كدا .... ووضعت تأثير الضوء اللي علي اليمين 

ووضعت الخط وميلته واستخدمته بلون الخلفيه

وبس ياسيدي وراحت معيطه ، ورفعت الصوره عل الفيس وخدت 5 لايك وكومنتات كتير 

وفي النهايه اتمني تصميمي يكون عجبك عزيزي القارئ وسوري للشرح المفصل الممل

ورأيك مهم عزيزي القارئ اي حاجه ، متنسناش في الكومنت 

تحياتي

بسنت نبيل

مدونة دو .. ري .. مي

حيث تصبح الحياه .... لحناً فرنسي الرنين

هندون كل يوووووم !

وطبعاً بما اني اخدت الأجازه ....

وبقيت فاضيه وقاعده طول الليل والنهار قدام الفيس او اي حته تانيه

علمت من اختي عن حملة المدونين بأسم ( انا هدون كل يوم ! )

طول شهر 6 وعليكوا خير ،

فقلت اشطه ،، نشترك مفيهاش حاجه 


لذلك اعدكم قرائي الأعزاء ،، بمدونه مجانيه كل يوم 

لذلك فاحذروا .. الكميه محدوده !

وهي تدوينه واحده كل يوم ، مش زبرميط هي !
 

وبكره انتظروني في اولي تدويناتي غداً
 

ولكل المدونين الأينفنت بتاعة الحمله علي الفيس هون

وتحياتي
بسنت نبيل
مدونة دو .. ري .. مي
حيث تصبح الحياه ،، لحناً فرنسي الرنين  

باااك .. وداعاً مدرستي العزيزه

وبعد ( برب ) طويييل استمر لمدة اسبوع ... او اكتر مش فاكره !
اخيراً خلصت امتحانات والحمد لله نصها عدي علي خير
" ومحدش يسألني النص التاني ايه اللي حصل فيه "
والحمد لله خدنا اجازه اخر السنه ،، وفي انتظار النتيجه !
" ودي ان شاء الله تدوينه تانيه خالص بقي ! "
والحمد لله انا كده بودع تالته اعدادي لأروح وبكل فرحه وسعاده الي ان شاء الله يعني ثانويه عامه
والصراحه عزيزي القارئ مش عارفه ايه المفرح في كدا ! ....
هخرج من دراسه هخش في دراسه تانيه
وبدل مالكتاب هيبقي 100 صفحه هيبقي كتابين وكل كتاب فيهم 200 صفحه !
بس هما اللي قالولي ان ده المفروض انه يبقي مفرح يعني !
بس المهم يعني خدت اجازه وهنبقي في الصيف بقي وهروح مصيف واشوف ترعه او بحر الله اعلم !
واحتمال كمان منطلعش مصيف خالص !
( مش عارفه ايه الأجازه التيت دي ! )
بس برضو مهما كان اجازه وليها فرحتها .....
اه صحيح .... قالولي انهم هيعملوا ثوره ان شاء الله يوم الجمعه في الميدان !
مع اني افتكر اننا في اجازة نص السنه المنبوذه دي ... علمنا ثوره اظن اسمها " 25 يناير "
وشيلنا رئيس ، وشيلنا حكومه ، وشيلنا نظام ، والراجل اللي ورا عمر سليمان اكتشفنا انه حاجه مهمه
وهلال عرفنا منه ان شهداء 25 يناير ماتوا ف احداث يناير !
عملنا كل حاجه في الاجازه دي يعني !
اومال اجازة اخر السنه هنعمل فيها ايه تاني !!!!!


 واه صحيح بالمره ..... ايام مكنت دافنه راسي في الكتاب ايام الامتحانات
" او لما كنت نايمه عليه الله اعلم ! "
قالولي ان الدوري شغال وان ماشاء الله يعني الزمالك عامل شغله !
وان جوزيه اتجنن ! ،، وان الاهلي مستواه مش بطال !
الدنيا اتغيرت اوي ياجدعان !! ... فيييين ايام زمااان ييجي من شهرين كدا !
ايام فلافيو !!
( احم احم ،، ايه ده فلافيو ايه اللي جابوا هنا ؟ .... امشي يافلافيو امشي ! )


 طبعاً اللي بحكيه ده كله ياجماعه
" حد هيقاطعني ويقولي ولا حاجه ! "
هقوله شكراً عل الأهانه بس لا .... كل ده حاجات حصلت اكتشفتها بعد الامتحانات
اصل انا كل يوم اروح اللجنه .. اكتب نفس البيانات " واحياناً بكتب نفس الاجابات "
واروح البيت اذاكر نفس الكلام !
 واشوف ناس واقفه علي اللجان غريبه جداً
مره واحد شديد اوي .... مره واحده سايبه خالص ....
ومره واحد اهبل ... ومره واحده عاملالي عفاف شعيب في مسلسل العار والحرام يابني والحرام يابنتي !
 ومره واحد قليل الأدب علي الفاضي .... ومره واحد رذل !
فطبيعي مش هركز في حاجه تانيه يعني ! .... بشوف كل يوم غرائب وطرائف اللجان
وطرق الغش اللي عمري مجربت اعملها " انا اخري وشوشه بس .. واحياناً بغشش غلط :P "
اشوف صاحبتي مخبيه السماعات وواحد بيكلمها وهي تعمل نفسها بتقول السؤال في سرها
" وغالباً الواحد ده ياما ابوها ... ياما الولد اللي هي ماشيه معاه ! " 
وواحده مخبياه في البنطلون الكارينا ... وواحده مخبياه في الحزام
واشوف الطلاب الغلابه اللي بيبقوا مزاكرين ياعيني وبيعتمدوا علي نفسهم !
" فشله ! "

وفي النهايه احب اقولكم اني اشتقتلكم كتير
وانتظروني ان شاء الله في تدويناتي القادمه ... وقريباً في الاسواق بعض الألحان
" من تأليفي" ..
 وشوية صور حلوين برضو !" من تصميمي "
( حد هيقولي اتعلمتي الكلام ده ازاي ! ... هو انتي مش كنتي في امتحانات )
هقوله التدوينه خلصت ومش هرد عليك !

تحياتي
بسنت نبيل
مدونة دو .. ري .. مي
 حيث تصبح الحياه .... لحناً فرنسي الرنين 

برب طوييييل ( Be right back )

بما ان الأمتحانات علي الأبواب 

وبما ان امتحاني يعتبر الأسبوع الجاي 

وبما اني محتاجه اذاكر بجهد الأيام دي

( وده بسبب الشهاده عقبال عندكوا )

لذلك

فلقد اتخذت قراراً اريدكم جميعاً ان تساعدوني عليه

لقد قررت ان اتنحي تماماً .... ونهائياً

عن اي منصب تدويني

واي دورً كتابي 

وان اعود الي صفوف الطلاب 

اؤدي مزاكرتي معها كأي طالب اخر

لأن قوه المذاكره اصبحت اقوي من قوة المدونه علي
والله هو الموفق والمستعان 

" احم ،،، الموفق والمستعان دي من خطاب تنحي مبارك بس مش مشكله لايقه برضو "

وفي الأخر احب اقول لكم بلغة الفيس بوك ( بـــرب لمدة شهر )

تحياتي

بسنت نبيل

مدونة دو .. ري .. مي

حيث تصبح الحياه ،،، لحناً فرنسي الرنين

وحوش مدينتنا ( من كتاب اعذريني .. ومخاوف اخري )

في مدينتنا نحن دوماً خائفون .. مذعورون ..

في مدينتنا لا نستطيع الخروج من بيوتنا في الصباح ،

في مدينتنا نحن دوماً ننتظر رحيلهم ،

في مدينتنا تأتي لنا الوحوش صباحاً ..!

تأتي لنا تلك الوحوش الشنيعه ، ولا نقول انها شنيعه إلا لأننا نعرف ماذا تفعل

كل صباح ...

لا يجرؤ احد علي مغادرة بيته ، نظل فيها ونراقبهم من كثب ..

في مدينتنا الرعب مستمر ، يكاد يكون بلا نهايه 

يُحكي انهم هدموا من قبل بيت واحد منا ، وأخذوه رغــماً عنه بلا شفقه!

تثير بعض الحكايات عنهم رعبنا فقط ، بينما البقيه تثير هلعنا التام ... !

أصبح الخوف هو الأساس .. هو المنطق .. هو المعقول ...

في مدينتنا لا احد يخرج من بيته إلا ليلاً ؛ لأنهم لا يأتون ليلاً

في مدينتنا .. نشعر بالهدوء والسكينه ليلاً ، بينما الترقب والفزع المحبوس صباحاً

تسألنا ...

ولِمَ لا نهجر مدينتنا ..؟؟

كَلا ... لقد فات الأوان ، ولن توجد ابداً فرصه للرحيل ..

يأتي الصباح ، ويأتون هم معه .. يصدرون ذلك النواح الغريب ..

بعضهم يقف محمقاً امام احد البيوت 

بعضهم يضع شيئاً ما امام بعض البيوت ..

ونرجوا ان يذهبوا يوماً ما ..

احياناً ينضم بعضهم الينا .. ولا نلبث ان نجده ينتمي الينا .. ويصبح واحد منا ..

في الليل ..

الليل يأتي بظلامه الذي يغطي علي كل شئ 

لا توجد مصابيح ضوء في مدينتنا ..

في الليل ...

نخرج نحن الاشباح لنلعب في مدينتنا ...

المقبره !!

اسماعيل خالد وهدان 

( ضمن مجموعة مواهب )

تحياتي

بسنت نبيل 

مدونة دو .. ري .. مي

حيث تصبح الحياه ... لحناً فرنسي الرنين

( بقي كل ده عل المسرح !! )

في يوم من ذوات الأيام ... كنت قاعده بتفرج علي التلفزيون

كسد فراغ وقتي يعني ليس اكتر !

لحد ملاقيت الفنان فريد الأطرش 

طالعلي كدا قدام الشاشه

هو والمرحومه ساميه جمال واسماعيل ياسين

وبيغنيلي " بساط الريح " 

( بساااط الريح حلو ومليح حلو يامحلاه بساط الريح بساط الريح )

وياسبحاااااااان الله 

الاقي علي حين غره !

البساط طاير في الجو !

" ياسلااااام .... طول عمرنا خيالنا واسع "

وياريت كان علي البساط وبس

إلا لاقتهم فجأه بيروحولي بغداد

( بلاد بغداد بلاد بغداد .... بلاد خيرات بلاد امجاد )

وشويه يروحوا تونس 

( ياتونس الخضراء ... خضرااااااء )

وحودوا علي بلاد الشام ... وفي الاخر يروحولي مصر !

كللل ده عزيزي القارئ

والاقيلك في النهايه الجمهور بيسقف !

هو كل ده كان علي المسرح اساساً .... 

بس طبعاً بعد كدا عرفت 

ان معظم افلام السينما القديمه 

كانت بنفس " التيبه "

ياسيدي بلاش دي !

اقل مثال تاني ...

محمد فوزي وتحيه كاريوكا 

في فيلم " حب وجنون "

كان في اسكتش في الفيلم

( اسمه مملكة الشياطين )

كان موضوعه ان الجن تحت الأرض

لهم شبيهم في الأنس ... وإن عشان الجن دول يتجوزا

لاازم البشر اللي شبههم يتجوزا برضو!

والأسكيتش كانت بتدور فكرته ان الجن دول بيحاولوا انهم يجمعوا

الاتنين البشريين دول علي بعض

بس المشكله ان شبية تحيه كاريوكا كانت فقيره

وشبيه محمد فوزي كان امير

مش هي دي المشكله سعادتك !

المشكله انهم كانوا عامليين الانس والجن 

وكللل ده ورا بعض ... 

ونذهل في اخر الاسكتش ... ان الشاشه اتقسمت نصين

كمشهد النهايه السعيد يعني ، النصين كانوا مقسمين كالأتي

نص فيه الأنس محمد فوزي وكاريوكا وهما واقفيين جنب بعض في الفرح

والنص اللي تحت فيه هما هما نفس الاتنين بس بخلفيه تانيه وهما جن !

وعشان يقنعونا ان ده مسرح !! ... جايبين الناس في الاخر وهما واقفيين وبيصقفوا في الصاله 

( وصباح الخير بليل بقي !! )

من العروض اللي المفروض انها تبقي مسرحيه

في السينما المصريه القديمه

الاستعراض اللي كان في فيلم ( النمر )

لنعيمه عاكف وانور وجدي 

نفاجأ عزيزي القارئ " زي كل مره يعني " 

بالعرض اللي عملته علي ( المسرح )

لما كانت عروسه والمفروض انها بتدور علي عريس ليها

وبتلف البلاااد ... وفي الأخر تختار المصري كالعاده

وسبحان الله .. نلاقيها راحت لباريس 

لتجد عريس باريسي ... مايص !

وتكلمه وترقص وتتشاور وتتحاور والغريبه ... انها نعيمه عاكف برضو !

بس عامله ولد علي المسرح ... ( معلش بنتنا برضو )

ونجدها بعد كدا تذهب الي شيكاغوا وبلاد الويست 

لتجد العريس الأخر لتتحاور وتتشاور وتتراقص معه برضو ... وبرضو يطلع نعيمه عاكف !

( مش مشكلللله .... هنعديها )

ونجدها بعد هذا تتوجه للبنان ... وتجد الرجل اللبناني

وبعض ميحصل كل اللي اتعودنا عليه ... برضو هو يكون نعيمه عاكف !

لحد مافي الأخر تروح لمصر وتحتفل مع المصريين بالعريس المصري اللي اخترته

عشان شهم وجدع وكل الحاجات اللطشيفه دي !

ححححح .... وبرررضو نجد الجمهور واقف وبيصقف 

" عاااااا .... عل المسرح ياكفره !! "

واخييييييراً .... مييين ميعرفش فيلم ( صغيره علي الحب )

لسندريلا الشاشه المصريه " سعاد حسني "

لكن برضو ! ... نتفاجأ بعرضها اللطيف اللي كان علي المسرح

بتاع " عم حزونبل "

بدايتها مع الاطفال وعم حزنبل 

متوجهه في غمضة عين ... الي عالم الكبار الوحشيين 

وف ثانيه " عل المسرح "

نجدها مع عمو البحاار ... اللي كان هيحكلها حكاية البلبل

( واللي كلنا كنا نفسها نعرف ايه هي القصه دي ! )

( بس عم حزونبل الرخم جه وقطعها ! )

طبعاً مش هما دول بس كل الاستعراضات 

اللي المفروض انها ( عل المسرح ! ) 

لا ده انت ياعزيزي القارئ ... هتلاقي من الهبل ده كتير اوي

مايكفي لجعل عقلك يشيط ويميض " حلوه يميض دي "

وهتلاقي علي لسانك كلمه واحده ... لو اتفرجت

علي اي من تلك العروض اللي حكتلك عليها دي ...

( بقي كل ده عل المسرح !! )

لكن للي مش متابع افلامنا القديمه 

او مش عارف بنتكلم علي ايه ... متسكتش علي حالك كدا 

باهديلك في مدونتي الحلوه .... (الـلأربعه الكبااار )

" متفتكرش ان هديك روايه انا هديك الاربع استعراضات دول "

" عشان تتفرج وتحكم بنفسك "

بسااط الريح لفريد الأطرش

استعراض مملكة الشياطين لفوزي وكاريوكا 

صغيره علي الحب

( ونعتذر عن عدم ايجاد استعراض نعيمه عاكف نظراً لأنه قديم فحت )

تحياتي 

بسنت نبيل

مدونة دو .. ري .. مي 

حيث تصبح الحياه .... لحناً فرنسي الرنين !

BE ... MR.HAPPY

Live ... Love ... Laugh 

( شعار Mr.happy )

الشعار ده عندنا خدناه بس عدلنا فيه كتير 

بقي شعارنا دلوقتي

( طنش ... تعش ... تنتعش )

كنت قاعده علي الفيس كعادتي اليوميه 

عشان اشوف اخر الاخبار واتسلي شويه يعني " كنوع من الهرب من المذاكره "

لاقيت منشور كدا لطيف خالص .... اول مقريته لاقيت الابتسامه علي وجهي اتسعت اوي 

طبعاً قلت " حاجه زي دي مينفعش تعدي من تحت الكيبورد بتاعي "

بيقولك ايه بقي ( Mr.Happy  المصري !! )

اشتري علبة شوكولاتة مستوردة غالية و كلها

بص على بنت حلوة و ...إعرف أنها لو عرفتك كويس أكيد هتحبك

إلعب لعبة مالعبتهاش من و إنت صغير

إعرق و إنهج و حس إنك عايش

إطفي نور أودتك شغل التكييف إسمع أكثر مزيكا بتحبها و إسرح معاها

بص لأهلك و عرفهم قد إيه بتحبهم

بص للي تحتك و إعرف قيمة كل حاجة معاك.
بص للي فوقيك و إعرف إن رغبتك إنك تبقى زيهم هي اللي مدية طعم لحياتك

إستمتع بشمس الصيف.. بصلها و قولها إنك مش كارهها.. حتى لو عرقتك و لزقتك

روح أقعد على البحر.. دخل رجليك في الرمل.. و خرجها.. بطل تفكير.. و إبدأ حس

في الشتا إنزل تحت البطانية و حط كوباية الشوكولاتة السخنة جمبك.. إبتسم و غمض عينيك و نام

إشتغل لحد ما تحس إنك مت.. نام ثاني و إشحن و روح موت نفسك ثاني.. وإعرف إنك زودت حاجة للدنيا ماحدش كان هيزودها غيرك

إعرف إنك كائن مهم و في كل لحظة بتغير إتجاه التاريخ

بص لشحات واقف جمبك.. ماتديلوش ولا نكلة.. بس سلم عليه و إضحكله و قوله عامل إيه؟ تمام؟

بص لبنت مغرورة و إضحك من جواك

بص لبنت وحشة و عاكسها بنظراتك و إعرف إنها هترجع البيت مبسوطة

بدون سبب إبعت رسالة لأي حد بتحبه قوله حاجة حلوة

خلى اللي يكره يكره و اللي يشتم يشتم وإعرف إنهم مضيعين وقتهم

إتأكد إنك لو عارف إنك هتموت بكرة هتعمل نفس اللي بتعمله دلوقت

حب جامد قوي حتى لو حبك مش هيستمر لحد بليل

كل أكلة حلوة قوي.. بس ماتخليهاش تشبعك

إشرب مشروب دخلت المطبخ و إخترعته و لو ماعجبكش إرميه في الحوض و إنزل إشرب حاجة ثانية بتحبها

ماتشربش شيشة أو سجاير.. إشرب الهوا.. إستمتع بيه.. مش هتعرف قيمته إلا لو خلوا الهوا بفلوس.. ساعتها هتستمع بيه كأنه سيجارة حشيش مغربي

بطل خمرة و مخدرات.. و إتعلم إزاي تستمتع بحتى أوحش الحاجات حوليك

أكسب نفسك و حب حد بيكرهك

إكسب نفسك ثاني و حب حد بتكرهه

إكسب نفسك ثاني و إنسى حد لسه بتحبه من غير ما تكرهه

إتفرج على ماتش كورة لفرقتين ماتعرفهمش و شجع واحد فيهم قوي.. قوي.. حتى لو كان بيلعب زي الزمالك.

إنزل شجع مع الزملكاوية لما يكسبوا.. حتى لو إنت مش زملكاوي

إقرا الكلام ده من غير ماتعلق عليه و لو مش عاجبك بطل قراية

شوف فيلم الكيف و ماتتفرجش على آخر ربع ساعة فيه

إتفرج على الناظر من أول ما بيظهر محمد سعد

لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم

إقرا كتاب عن موضوع معقد مانتاش فاهمة و بعدها إنزل مع صحابك.. هتتبسط قوي

جرب أكلة جديدة في مطعم فخم.. ثمنها يخرب بيتك.. و روح و إنت مبسوط.
شد مع عربية سيات

إلبس أحلى لبس عندك و إنزل إمشي في الشارع و إنت فارد ظهرك.. و ماتحطش إيديك في جيبك خليهم أحرار

إشتري ورد لواحدة تعرفها عادي.. و قولها أصلك زي أختي و بعزك قوي.. هتتجنن

إرقص حتى لو في أودتك و إنت قافلها بالمفتاح.. ممكن تغني كمان و إنت ماسك الفرشة على إنها ميكروفون

إفتكر قبل ما تنام كل الكلام الحلو اللي سمعت الناس بتقوله عنك

كل ما تلاقي حد بيحكي عن مشكلة دورله عن الجانب المشرق فيها.. مهما كانت عويصة.. طلعله فيها فوايد و باركله

كل ما حد يقولك إزيك عامل إيه؟ قوله الحمد لله مبسوط قوي.. قولها بسرعة من غير ماتفكر و إبتسم.. لوحدك هتتبسط فعل

شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا

فكر في الموت كويس.. و إعرف إنه لسة ماجاش و إعرف إنه قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما كان السبب

سافر حتة ماروحتهاش قبل كده.. صورها و صور نفسك فيها.. صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه وحشك

إستحمى في نص ساعة.. خلى المية تنزل على وشك و إسمع صوتها كويس

جيب لنفسك هدية و إستنى لحد عيد ميلادك و إديها لنفسك

جيب هدية لحد بتحبه من غير مناسبة.. و إديهاله في عدم إهتمام كأنك ماعملتش حاجة غريبة

إنزل من بيتك بشبشب و شورت من غير ماتسرح شعرك.. و إتأكد من جواك إنه عادي جدا.. أنا مش مهتم.. و خليك واثق من نفسك.
إشرب مية كثير

ماتغضبش مهما حصل

أشكر كل الناس بسبب و من غير سبب

لو حد إتريق عليك إضحك.. حتى لو من جواك بتضحك عليه

لو حد شتمك حط ده في تانك البنزين بتاعك علشان يبقى طاقة تحركك لقدام

لو الناس بعدت عنك إعرف لأنكم مش زي بعض.. لا هما وحشين و لا إنت وحش.. إنتم بس مش زي بعض.. و إتبسط إنك مش بتضيع وقتك معاهم

لو لقيت نفسك لوحدك شوية ده معناه إنك فريد و نادر من نوعك.. و مين في الدنيا يقول إن نوعك غلط أو وحش.. بس إنت تقدر تتأكد إن ده النوع المناسب ليك.. و إتبسط بيه.. و لو نفسك تغيره غيره.. مافيش حاجة بتلزق حتى إسمك و دينك

بص لإمبارح.. و شوف إتعلمت منه قد إيه

خطط لبكره بس إوعى تخاف منه .. إزاي تخاف من حاجة إنت اللي بتبنيها أصلا.. حاجة لسة ماحصلتش و ماحدش في الدنيا يقدر يعرف إيه اللي هيحصل فيها

إستمتع بالنهاردة كويس.. لأن كل نهاردة هيبقى إمبارح بتاع بكرة زي ما كان بكرة بتاع إمبارح

إسمع أغنية مدحت صالح وانا ويايا بعيش زي المليونيرات و شوفها على اليو تيوب و إضحك منها أو عليها.. بس في الحالتين هتضحك

لما حد يحكيلك حاجة مملة علشان يبين مواهبه في الحياة إعمل نفسك متهم آخر حاجة و لما يخلص إعمل نفسك منبهر آخر حاجة برضه.. و كمان إسأله عن تكملة الحكاية.. بس ماتعملش كده كثير.. مرة كل فين و فين

إفتكر أيام لما كنت بتصحى بدري علشان المدرسة.. و لما كنت بتذاكر فيزيا أو تاريخ.. و أهلك مانعينك من النزول و إتبسط إن ده كله خلص و مش راجع ثاني

انا اراهنك ... انك بتبتسم دلوقتي

مهو لو مبتسمتش علي اي حاجه من دي

ابقي انا فشلت

فشلت ؟؟؟

انا فشلت عاااااااااااااا 

تحياتي

بسنت نبيل

مدونة دو .. ري .. مي

عندما تصبح الحياه .... لحناً فرنسي الرنين

اللقاء الأخير ...... مختلف جدا

والأن....

مع لقاءنا الأخير ، اللقاء اللي من وجهة نظري

كان الطف لقاء انا عملته ... لأني عملته مع شخص "عاقل شويه"

 اللقاء ده انا حطيته علشان عجبني ، مع اني كنت ممكن محطوش

( اه انا حره في حاجه !!!!!)

المهم ... الحوار عملناه في الأستديو

علشان الضيف ميخدش عننا وجهة نظر وحشه 

انا: جاهز

هو: احم احم ..... يلا

انا: هدوء في الاستديووووووووو...... احم احم يلا

هو: ايواا معاااكى !!

انا: قبل منبدأ طبعا برنامجنا لازم نقول كلمتنا المشهوره
لكل اللي بيشرفونا في برنامجنا هابي نيو يير يازيكو

هو: احم..... انتى بالصحه والسلامه

انا: قولي برايك كده .... ايه افضل حاجه حصلت لمصر عام 2010 ؟

هو: اممممم طبعا تحقيقها للرقم القياسى وحصولها على كأس افريقيا السابعه لتالت مره ع التواااالى

انا : اها ...... طب واحسن حاجه حصلتلك في 2010 ؟؟؟؟

هو : احسن حاجه حصلتلى .. السؤال دا اجبارى ^^" ؟

 اصلها مكانتش سنه حلوه اوى يعنى

انا: احم احم ...... ده بعد اذنك يعني مفيش اي حاجه خالص يعني ؟
معرفتش حب جديد ..... مشفتش حاجه لاول مره ....
انا بغششك يعني المفروض تجاوب بسرعه

هو: طيب يب حب جديد حب جديد 

 يابنتى انا عارف بس بختبرك

انا: ههههه ربنا يستر علينا
طب السؤال الاسهل بقي ايه هي اوحش حاجه حصلت لمصر عام 2010؟
ولو انت زكي (زي اسمك) هتقول الاجابه اللي انا مستنياها

هو: اكيييد طبعااااااا .. انها طلعت من تصفيات كاس العالم بجنوب افريقيا 

هاتولى منديل هاتولى منديل 

انا: معندناش ......الاستديو مفيهوش منديل

هو: اخر مره اجى برامج غلبانه كدا 

يعنى امسح ف كمى يعنى 

انا: يكون احسن بس ورا الكاميرا
متكسفوناش بقي
انا: احم احم .... نكمل

هو: احم يستحسنض2
 
انا: ايه هي اوحش حاجه حصلتلك في 2010
 حصلتلك انت.... انت، انت انت ولا انتش داري 
ههههههه.... احم احم.... جاوب جاوب

هو: مزيعه من شارع محمد على ض5 

انا: ههههههههههههه

هو: طيب احم .. انى لسه ف سنه اولى ف الجامعه دى اوحش حاجه

انا: طووويب.... السؤال الاشهره شهره توقعاتك لسنة 2011 باماااانه 

هو: اتوقع حروب اكتر وبلاوى اكتر واتوقع جمال رئيس مصر يعنى مصر هتفضل تعمل مفاوضات تهدئه والجو دا ومفيش جدييد  
انتى نمتى ولا ايه ؟؟؟؟

انا: لا بستغفر ربنا

هو: هههههههههههههههههههه
 
انا: سؤالنا الاخير وبما انك كروي اوي 
هتجاوبني عليه

هو: ايه كروى اوى دى وشى مدور يعنى ؟؟؟
 
انا: تتوقع مصر تطلع كاس العالم 2014 ؟
 كروي يعني غاوي كوره

هو: طووويب  
اممممممم يب ان شاء الله مصر هتطلع كاس العالم بسهوله جدا .. ياماما احنا التاسع ع العالم فووقوو بأى عاوزين حبه ثقه ف المنتخب مش كدااا

انا: وانا مالي ياعم هما اللي جايبين الاسئله
طيب ..... عندك كلمه اخيره تقولها لحد؟؟؟
اي حد

هو: حد شخصى يعنى ولا حد مين بالظبط 
 
انا: ايييي حد

هو: حددو اسألتكو بأى

انا: انتوا اللي افهموا بقي انا عمري ماستضفت حد كده قبل كده

هو: طيب احب اقول للريس ربنا يديك طوله العمر ياريس واهديولو بيت شعر قاله الزعيم عادل امام " هشتكنا وبشتكنا ياريس .. دانتا رئيس والنعمه كويس "
انا: هههههههههههههه

انا: طب وحد شخصي
الواد لوشين قال للمنتدي كله

هو: اممممم احب اقول للوشيين 
" يابنى كفايه كورى مش كويس على شانك تحسى انه بأى شبههم

انا: ههههههههه.....ياراجل هما الكوريين بعجروا اوي كدا؟؟

هو: هههههههههههههه لا لا ماهو مش شبههم اوى يعنى 

 بس عارفه يعنى نفس ستايل الشعر العظيم دا

 يللا بأى كفايه كداا 

انا: ياريت برضوعلشان معاد برنامجنا خلص يلا هابي نيو يير
يعني كل سنه وانت طيب

هو: وانتى بالصحه والسلامه وعقبال عيد العمال كدا ....
 
انا(بصدمه): عيد العمال ؟؟؟!!!!
 كاااااااااااااااااااااااااااااات

واحب اقلكم الكلمه المشهوره

" هو ده مسك الختام "

بس الكلمه التانيه المشهوره

" Happy New Year Egypt "

واتمني يكون اللقاء عجبكم وكل اللقاءات اللي فاتت 

برضو تكون نفس النظام ....

وانتظروني مع كل جديد وجديد

في عام 2011

مع مدونة دو .. ري .. مي 

 ***********************

عزيزي القارئ 

هذا اللقاء كان معمول من قبل مسنة 2011

تهل علينا بحلوها ومرها

" او في الظروف دي اقدر اقول مرها بس "

ويبدو ان زميلي اللي تنبأ باللي هيحصل

كان محق ساعتها ،،، كنت فاكره انه متشاؤم

بس طلع عنده بعد نظر لا اكثر ولا اقل !

احنا مقدمناش غير اننا ندعي 

ان السنه دي تتنيل وتخلص بقي

عشان بجد بجد يا2011 

احنا تعبنا منك اوي اوي !!!

تحياتي

بسنت نبيل

مدونة دو .. ري .. مي

عـــــيـــــش الــــــحــــــيــــاه ....بس !