اعزائي المشاهديين
اعزائي القرااااء
مرحباً بكم في برنامجنا الحماري
( احم ... الحواري عفواً )
" 25 "
طبعاً الكل دلوقتي بيسأل
( 25 اييييه ؟! )
مش هجاوبك علي فكره ... عشان خلاص الرقم ده بقي طابع
علي قلوبنا ، زي رقم ابو تريكه " 21 "
لذلك برنامجنا هيستضيف كل يوم فرد من افراد مصر
من مناطق مختلفه ونعرف رأيهم فيـــ.......
وكان حوارنا الأول مع طالبه في الصف الأول الثانوي
من محافظه الأسكندريه ...
وهوريكم الحوار ناو ..
( المكان )
استديو مجهز بطريقه رهيبه ، الكاميرات مجهزه عي مكان المذيعه
والضيفه ... يوجد كرسيان وبينهم ترابيزه عليها فاظة ورد احمر بلاسيتك
انا : ميلو عاوزه اعمل معاكي حوار للمدونه.... ممكن ؟
هي : اعملي ياتي
انا : حلو اوي احم احم ....
هدوووء ف الأستديو بقااااا
وكوباية ميه هنا للضيفه
عاوزه حاجه تانيه مع الميه ؟
هي : اي ساندوتش ^_^
انا : ساندوتش !!! نبدأ ياجمااااااعه
( تبدأ الكاميرات بالشغل ... والأنوار بالوميض .. والمقدمه بالأنتهاء )
انا : طبعاً احب ارحب بضيفتي العزيزه
جداً عليا سمر ....ولقبها ميلو
اهلا بيكي ف حوارنا النهارده ياسمر
هي : اهلا بيكى يا بسبوستى ....وميغسى على الكلام الحلو دا
انا : ده اقل حاجه ... قوليلي بقي ياميلو انتي من الأسكندريه صح ؟
هي : يب
انا : طبعاً ياسمر انتي شهدتي الثوره العظييمه بتاعة 25 يناير مش كدا ؟
هي : اكيد طبعاً !
انا : قوليلي ايه رأيك ف الثوره دي ؟
هي : ثورة 25 يناير من اهم الثورات اللى حركت الشارع المصرى
وغيرت الحياة السياسيه 180 درجه
وكشفت عن فساد كتير
وغيرت من شخصيه المواطن المصرى
وبقى اكترايجابية
ودا اللى كلنا شفناه يوم الاستفتاء
انا ( بنظرة تحدي ) : مممم ....كلام مثير
ياتري ده رأيك .... ولا ده اللي انتي سامعاه من الناس
ومحبتيش تعارضيهم
عشان ميقولوش عليكي خاينه ؟؟!!
برنامجنا برنامج صراااحه
هي : لا ده رأيي اكيد
ولو انا كدا فعلا
كنت قولت نعم مع كل اللى قالو نعم
وبعدين انتى حطيتى ايدك على نقطه مهمه جدا
ان اى حد ليه رأى غير رأى الأغلبيه
بيعتبر خاين
ودا من حجات كتير لسه عايزا تتغير فينا
انا ( ثبتتني بنت الأيه ! ) : اوك ياسمر ... هل كنتي من المؤيديين لرحيل مبارك ولا لأستمراريته ؟
هي : قصدك بعد الخطاب العاطفي ؟
انا : هههههه ... تقدري تقولي كدا !
هي : اها
هو اكيد كلنا كنا عايزينه يرحل
بس النقطه كانت
هل يرحل دلوقتى
ولا يسلم البلد أمنه ويرحل
بس اكيد كان لازم يرحل وقتها
لان لو كان فضل
وحطت لنا نظام على مزاجه
كان هيبقى زى النظام السابق
بس مجرد تغيير للاسماء وللوجوه
فيما معنى
انى كنت بأيد رحيله ^_^
انا : ايه احوال اسكندريه لما حصلت الثوره ؟
هي : رغم انى كنت مشوشة شويه فى الفتره دى
اسكندريه كانت من اكتر المحافظات اللى حصل فيها
شغب ومظاهرات
مع ذلك كان الاعلام موجه اهتمامه كله لميدان التحرير
لكن برضو المحافظات التانيه كان فيها مظاهرات احيانا اكتر من القاهره
وكان مسجد القائد ابراهيم .... هو المكان اللى بيتجمع فيه الثوار
انا : وف نهاية حوارنا ... اووو نسيت اهم سؤال
مكتبة الأسكندريه ... ايه اللي حصلها لما الثوره بدأت تشتعل اوي
واعمال الغضب بدأت تبان ؟
هي : اتقفلت ياتى
وكان عندها لجان شعبيه
فضلت مقفوله فتره طويله
مش فاكره ععد الايام
عدد 8
بعدين فتحت للموظفين بس ..
بس انا مكنتش اعرف وروحت ارجع الكتب اللى معايا
معرفتش ادخل ....فاتصورت مع الدبابه وروحت
انا : ف نهاية حوارنا
بشكرك كتيير
واقولك ياريت تركزي ف مذاكرتك
وتحياااتي ....وف الأخر
هي : الكلام ده ليا !!!
انا ( بصعوبه بحاول اتجاااهل ) : نفسك تقولي كلمه لحد ؟
هي : اممممم .... كلمه لحد ؟!!!
انا : اييي حد !!
هي : لا ينفع كلمه لسبت ..... اصل حد دا رخم اوووى
انا ( بغضب شديد ) : قلشه كمان من دي ... وهطلعك برا !!
هااه عندك كلمه !
هي : احب اقول لكل صحابى ..... اني بحبهم كتير وبس كدا ^_^
انا ( مع رفع الحاجب الأيمن ) : قاعديين في برنامج سينما الأطفال احنا ؟!!
هي : هههههههههههه
يلا يا اصحابى بباى
انا : باااي ياميلو
( لبرهه من الزمن كنت حسه ان انا في عالم سمسم مش عارفه ليه !! )
( تطفئ الكاميرات ... تتر النهايه ينزل .... والضيفه تخلع )
وأحب اشكركم ف نهاااية الحوار ولمتابعتكم معنا
واستنونا ياما في محافظه تانيه .... اما في منطقه تانيه
تحياتي
بسنت نبيل
مدونة دو .. ري .. مي
حيث تصبح الحياه ..... سيمفونيه
يالها من احلامً منهيه 
