باحب المزيكا ............... الـjazz

مستمع الـJazz

 يالذيذ يارايق !!!!!!!

مستمع الجاز ده تحس انه واحد رايق كده وعمال يشتغل الناس 

عارف انت شعور انك تبقي مخنوق ونفسك تضرب حد

وفجأه تلاقي واحد جاي ويقولك بكل هدوء وروقان

" معصب نفسك ليه ؟؟؟ دي الدنيا جميله "

( طخ .... بوووم ... اااااااااه )

احم احم ...... طبعا دي نتيجة اللي يهزر مع واحد مخنوق

ايا كان ...... اه كنا بنتكلم عن مستمع الجاز 

عارف انت شعور لما يكون واحد مخنوق ...... ايه ده ؟؟!!!!

لالا لحظه انا قلت الكلام ده قبل كده 

خلاص نروح  للنقطه اللي بعدها 

مستمع الجاز ودانه بتبقي موسيقيه جدا 

لان بطبيعة الجاز دايما في الات شغاله مع بعض " الله ينور "

فبكده يقدر يميز التشيلو عن البيانو عن .......

" احم ..... للاسف في الات كتير مش فاكره اسمها الحقيقه "

 
وطبعا  الجاز له معجبيه كتير
ولما سألت واحده من معجبات الجاز " اختي يعني "
كان الحوار كالأتي

انا : ايه شعورك وانتي بتسمعي الجاز ؟

هي : يااااااااه الجاااااز ....... ححححححح الجاااااز

انا ( بانتظار ) : انتي واكله نعناع ولا ايه ؟ ماله الجاز ؟

هي : حححححح الجااااز 

انا : ايوه عرفنا الجاز ..... اللي بعده

هي : الجاز ....

انا ( بلهفه ) : ايوه !!!

هي : الجاز مزيكا 

انا : يارااااجل ...... طول عمري فاكره الجاز بيجبوه في طبق اليوم مانا عارفه انه مزيكا  مالها بقي المزيكا دي ؟

هي : الجاز مزيكا مختلفه .

انا :  ماشي كويس ... كملي

هي : الجاز مزيكا مختلفه جدا !!!

انا : لاحظتوا انتوا الكلمه الزياده دي ...... كملي كملي

هي : الجاز .. مزيكا تمس الروح

انا : تمس الروح ؟؟؟ ايه تمس دي ؟؟

هي: الجاز هو موسيقي الخمسينات بتاع السود ولما تسمعيها تحسي انك خدتي

      جرعه موسيقيه دسمه 

انا : اممممم ...... حلوه جرعه موسيقيه دسمه دي !!! اقنعتني 

هي: الجاز ..... 

انا  (مقاطعه ): خلاص شكرا ... كفايه روحي ارجعي انتي من الفيلم الابيض واسود اللي كنتي عايشه فيه ده .....تمس وجرعه دسمه ؟؟؟؟ ده انقرض الكلام ده .

وده كان مثال يوضح فعلا ان مستمعي الجاز دول عالم رايقه !!!!

 زي مانا قلت في الاول خالص 

وللي ميعرفش الجاز .... او مين اللي بيغنوا جاز

اسمحولي اعرفكم علي عمالقة الجاز 

  

   
Ray Charles








  

                                       

Louis Armstrong 

  

   

Bill Withers

دول اشهر 3 من المغنيين الجاز 

وهما دول اللي صنعوا التاريخ 

علشان كده انا بحب المزيكا ............. الجاز  

تحياتي

بسنت نبيل 

مدونة دو .. ري .. مي

حيث تصبح الحياه ..... سيمفونيه

باحب المزيكا .......... الراب "1"

مـــســتــمــع الــــراب 

دايما متبهدل في دنيته مش عارفه ليه 

دايما حقه مضطهد بين كل الناس

عمره ميعرف يقول رأيه في الفن او في اي حاجه تانيه

كل الناس بتعامله معاملة الكبريت !!!!

بس سيبك انت ........ شعورك وانت بتسمع اغنيه راب

كلماتها واضحه وصريحه وموضعها هادف

 " اينعم ده موضوع نادر شويه "

   

بس برضو شعورك وانت بتردد الاغنيه معاه 

وراسك عماله تتهز كده مع اللحن

وتتخيل انك علي المسرح وماسك المايك وقدامك كل اللي بتحبهم

وعمال تغني وتجعجع

شعور لذيذ 

وخصوصا وانت لابس الهيد فون وبتديها 

كل واحد له اسلوبه لما بيسمع راب

في اللي يسمع ويهز راسه وبس

وفي اللي يسمع ويغني ويهز راسه وبس

وفي اللي يقوم ويقف قدام المرايا ويغني ويعمل كل حاجه 

وفي اللي مبيسمعش خالص

ودول بقي اكتر من الهم علي القلب

بس مش معني انهم مش بيسمعوا راب

انهم مش بيسمعوا حاجه خااالص لأ !!!

في بيسمع ميتال ...... وفي دماغه عاليه يسمع هارد ميتال

في بيسمع كلاسيك ....... وفي دماغه رايقه وبيسمع جاز

في بيسمع هيب هوب ....... بس بيحب الراب هاهاها 

وفي بيسمع عمرو دياب ......... وبيسمع انجلش

مصر فيها 80 مليون مواطن واكتر 

كل واحد عنده زوق خاص 

في اللي بيكره المزيكا كلها ومريح دماغه 

بس اعذروني في الكلمه 

" ده انسان كـــــفـــــتـــــه "

بس رغم ده كله

انا بسمع راب ......... وبحب الغنا الراب 

تحياتي

بسنت نبيل

مدونة دو .. ري .. مي

حيث تصبح الحياه ..... سيمفونيه

باحب المزيكا .........

المزيكا التي فهمتها ........ ولم تفهمني !!!!

So I say

Thank you for the music, the songs Im singing

Thanks for all the joy theyre bringing

Who can live without it, I ask in all honesty

What would life be?

Without a song or a dance what are we?

So I say thank you for the music

For giving it to me

ABBA

 ____________________________________________

شكرا للمزيكا انا فعلا بقدملك كل احترامي

وتقديري ليكي وللشعور الجميل اللي بتديهولي

وشكرا للـ

Rock & jazz & classic & Rap & Metal & PoP & Opera

كل واحد فينا بيحب نوع محدد وبيحس بشعور جميل

لما بيسمع نوعه المفضل

مستمع الجاز ..... الرايق دايما

مستمع الروك ..... الروش دايما

مستمع الكلاسيك ..... الهادي دايما

مستمع الميتال ..... المرووش دايما

وكتيييييير مش هي دي بس الانواع لا المزيكا ملهاش اخر

وانواعها لاتعد ولا تحصي

 بس اللي بيفرق بين كل نوع ونوع

روح كل مزيكا فيهم .....

احساسك وانت بتسمع ومستمتع بالمزيكا

شعور جميل جدا وغريب !!!!

زي شعورك كده وانت بتاكل شوكلاته بليل لوحدك

لسه خارجه من الفريزر

شعور الاستمتاع بالشئ اللي ليك لوحدك !!!!

هي هي المزيكا

لما تحط السماعات في ودنك وتغمض عينيك وايا كان نوع المزيكا

تنفعل معاها بطرقتك وطريقتها

هي دي المزيكا ......... هي دي الروح

روح الاستمتاع بالشئ

علشان كده انا بحب المزيكا ......