بسنت في بلاد العجائب

آاااه يالها من ماده مثيره مليئه بالقوانين والتعريفات والمسائل 
تجعلك تعرف كيف يعمل كل شىء حولك .. تجعلك تحب اكتشاف العالم
( بسنت ... انتي لما بتجوعي بتقلبيها دراما ! )
يب يب ايه جو الدراما الرخيص دا !
الفيزيا دي ماده غبيه ، ليست بمثل غباء الكيميا ولا زي حلاوة ..... امممممم آاااه احم
الواحد لما لفها في دماغه الصراحه ملقاش ماده عدله !
النهارده كنت بذاكر فيزيا من 2 الضهر لـ8 بليل ، حفظ في قوانين وتعريفات وحل مسائل كلها متشابهه
من النوع اللي مينفعش يتضرب على الآله ، واللي اي طالبه غيري كانت هتجيب البتاعه بتاع الحلول وتنقل الأرقام
وفي وسط مذاكرتي ونقلي للأرقام ، بس فجأه لاقيت حفره عمييقه
آااااااااااااااااااااااااااه ...

~*~*~*~*~*~*~*~*~*~*~*~*~

آاااااه انا يستحيل انام على الكنبه هنا تاني !
كالعاده الدنيا حر ... قمت وغسلت وشي ، خدتلي دش دافي
لبست هدومي وخرجت ، فتحت الجهاز  ... الفيس !
Notification ، ناس ضافوني على جروبات ممله ، صحابي عملوا كومنت على الستاتيوهات والصور
ممل ... خليت الجهاز مفتوح وروحت فتحت التلفزيون ، مجلس الشعب بيناقش تطوير الثانويه العامه
آممم اقعد اتفرج .. { الدروس الخصوصيه بقت مشكله خطيره }
مدام قلت دروس خصوصيه تبقى راجل مش محترم ، قفلت التليفزيون
البيت كله برا ، قعدت على الجهاز تاني وفتحت الوورد
وقفتي فين امبارح يابت يابسنت ... آاااه اه الفصل التالت عايزه اقفله
- اكتب واكتب واكتب واكتب - خش الفيس ، غيرت الستاتيوس ( خلصت الفصل الثالث ادعولي ... )
تعليقات بعدها بـ4 ثواني ... رغي وهري ، قفلت الفيس وقعدت اكمل القصه
وياااااااااااااه ، 3 شهور عدوا هوا ياربي !
خلصت الكتاب ومعرض الكتاب قرب " محدش يركز في حتة معرض الكتاب دي لأنه اصلاً خلص من كام شهر "
خلصت الأهداء ، صاحبتي ربنا يخليهالي شغاله في دار نشر ، خدت الروايه
اخترت شكل الغلاف الثاني كان احلى على فكره ... 
دخلت الفيس ، عملت موعد ... ودعيت كل اصدقائي لحفل التوقيع الخاصه بيا وكلهم قبلوا ، او نصهم !
بس ياترى البس ايه ، البس الطقم الأسود ؟
لالا كئيب ، طب احمر ؟ ... ايه القرف دا ثم ان انا معنديش طقم احمر !
استرقيت على البلوزه الرمادي والبنطلون الجينز وطبعاً كعاد الناس المهمين بيروحوا متأخرين على معادهم 3 ساعات
روحت ، فعلاً فكر اني اهدي اهداء مخصوص لكل واحد فكره متعبه !
بس اخيراً خلصت ، خرجت مع اصحابي نحتفل ورجعت البيت وقعدت اتكلم معاهم على اللقاء
ياااه كان لقاء حلو بس عارفين لو كان .....

                             ~*~*~*~*~*~*~*~*~*~*~*~*~

بابا : هاه يابسنت عامله ايه في المذاكره شغاله ولا ؟
انا : لالا كله تمام
( ايه دا انا طلعت من الحفره دي ازاي اصلاً ! )
واو ، المذاكره دي فعلاً حلوه ... بتخليك في عالم تااني ، في عاااالم تاااااااني
ملووووش اثـــــــــــر
ولكن ها انا ذا ، قاعده قدام كتاب الفيزيا وبحفظ تاني في القوانين
صحيح هو انا قلتلكوا انها ماده غبيه ؟؟؟