اختي : احمدي ربنا إنك عديتي ... سيبك منهم !
أنا : يابنتي انا مش وضيعه !
------- حوار اخر -------
ماما : المهم انك عديتي ، خلاص سيبك منهم !
أنا : انا هقولك زي مقولت لأختي ... ياماما انا مش وضيييعه !
وهكذا كان يومي أيها الساده الكرام ، في أقناع أهلي اني مش وضيعه !
أحم ، طبعاً انتوا اكيد دلوقتي مش فاهميين حاجه من اللي بقولها حالياً
علي العموم خلوني أشرحلكم بهدوء
الموضوع بدأ ييجي من قيمة اسبوع !
عندما اتصلت بيا والدتي العزيزه ، واتحفتني بخبر إن تنسيق دخول الثانويه العامه
من 231 ! ( مئتان وواحد وثلاثون )
وللي مش مقدر خطورة الموقف ، فدا أعلي تنسيق حصل في تاريخ الثانويه العامه كله !
لَكن ده كان المتوقع من حكومتنا العزيزه ، اللي قالولنا قبل كدا إن علشان الثوره
التنسيق هيبقي قلييييييل ، وفي مستوي الطالب الأقل من الضعيف !
( هع ! )
المهم يعني ، اخدنا احنا طلاب تالته اعدادي البومبه
ولبسنا في مجموع التنسيق دا ، وطبعاً في الثانويه العامه .. لازم يبقي في تضحيات
وافاجأ انا بسنت نبيل ! ... ان أكتر من ربع الفصل معايا
وقعوا مني ، وراحوا لـ(أستغفر الله العظيم يارب) ، التجاره !
واجبي كصديقه للجميع ، اني أعمل اي حاجه !
أي حاجه ... دا حتي لا اله إلا الله ياجدع !
ولكن ، وَقفت دقيقه حداد مع نفسي ، أفكر واجيبها شمااال ويميين
ومش لاقيه اي حاجه اعملها ، طب اتصل بيهم
( اختي : تتصلي بيهم تقوليلهم ايه ؟ )
( احمدي ربنا إنك عديتي ... سيبك منهم ! )
( احمدي ربنا إنك عديتي ... سيبك منهم ! )
( انا : يابنتي انا مش وضيييعه ! )
وهكذا عزيزي القارئ ، أعتقد ان الرؤيه أتضحت ليك !
ولو مش اتضحت ولاقيت نفسك تُهت في نص الكلام
( فأبقي كدا أنجزت مهمتي ! )
لَكن ، انا حسه اني بحقد علي صحابي اللي وقعوا مني
اهو اهو ... انا شايفاه اهو " السؤال بيتنطط في عنيييك عزيزي القارئ "
هتقولي بتحقدي عليهم ليه ؟
هقولك ببساطه ... استريحوا اووووووي !
انا النهارده بس خدت كورس مكثف في الثانويه العامه وكيفية ممارستها
خلاني أعيط " حرفياً " لمدة 10 ثواني !
ايييييه الذللللل دااا !
لما الواحد يروح المدرسه ، ويخرج علي الدروس ، ويرجع هلكان وتعبان متأخر
ويقعد يذااكر اللي خده واللي مخدوش ، ويقعد يحل في الواجبات
دا يبقي ايه دا ؟ .... هتقولي الواحد لازم يتعب
( هقولك ماشي هو انا قُلت حاجه انا بفضفض بس ! )
هتتهمني بالكسل وأني عاوزه اسلك الطريق السهل واصبح في المستقبل ست بيت ملهاش مؤهل ، وتتهمني بالقصور الذهني زي ماختي اتهمتني !
( هقولك وربنا كُنت بفضفض بس مقُلتش حاااجه ! )
المشكله اني مطلوب مني احدد مستقبلي دلوقتي وحالاً وفوراً
وكأني هطلع كليه بعد بكره الضهر !
وأساساً بعد مسمعت كورس الثانويه دا ، بصيت للمستقبل شويه كدا
وكان تعليقي زي تعليق سمير غانم في المتزوجون
( مين طفا النور ؟ )
اسووووود ، مستقبل اسود ومهبب وملوش ملامح
لذلك فأنا فقط ، متفائله هههههه :D
هححح .... ولسه عزيزي القارئ ، لسه هشوف انا ايام سودا :D
معلش تعقيب صغير / علشان مبقاش " وضيعه "
حكومتنا الحلوه الحلوه ، قررت إنها تُشفق علينا ، وتنزل مجموع التنسيق شويه
وخلوه 229 ( مئتان وتسعه وعشرون ! )
ياااااااااااه وليه الكرم دا :D
أه وحاجه تانيه ياجماعه معلش
ياريت محدش يسألني عن مجموعي علشان علي رأي اختي
( احمدي ربنا انك عديتي )
احم ، الرؤيه اتضحت صح ؟
طوويب الحمد لله
دلوقتي اقدر اقفل التدوينه وانا مطمنه !
وإلي اللقاء في تدوينه أخري
(( بس هتكون فنيه المره دي ))
تحياتي
بسنت نبيل
مدونة دو .. ري .. مي
3 التعليقات:
أولا تفائلوا بالخير تجدووووووووه
ثانيا يا بوسبوس يا شقيه يا مليانه بالعفويه ما تخليش اصحابك يزعلوا الجامعه المفتوحه خلتها اييييييييييييييييييييزي خالص يعني ياخدوا الدبلوم من هنا واوااااااام على اي كليه نظري تعجبهم من تجاره لاعلام لحقوق لدار علوم لزراعه اللي يعجبهمواظن مصاريف التعليم المفتوح ما تضلعش قوي يعني على الأقل أخف بكتيييييييييييييييييييييييييييير جدا من الخاص ولو يا ستي مش عايزين يكملوا يبقى كفايه الدبلوم أما انتي بقا فارضي بما قسمه الله والحمد لله والف مبروك على نجاحك وعقبال ما اباركلك وانتي متخرجه من الثانويه العامه انا عارفه انك حتتعبي بس صدقيني أي تعب يهون قصاد فرحتك يوم تخرجك يااااااااااااااااااااااه مفيش بعد فرحة النجاح فرحه واسأليني أنا
آخر حاجه عايزه أقولهالك ايه كلمة وضيعه دي ايه اللي جاب الوضاعه للحوار وايه علاقة اتصالك باصحابك بالوضاعه هل قصدت امك ان اتصالك بيهم يقلل من شأنك؟
وضحيلي اكتر
ونصيحه عدلي البوست ده وامسحي كلمة اتفووو
انا مش بعدل عليكي بس ده رأيي لأن الثانويه ما تستاهلشي كده من باب انها طريق للعلم والعلم ارقى شيء في الحياه ومن باب تاني ان الكلمه دي ماتنفعش في قاموس التدوين أو الكتابه بشكل عام ولكنها تنطق فقط في موضعها فقط ويا حبذا لولم تنطق بالمره
تقبلي كلامي الثقيل نسبيا
وكل بوست وانتي طيبه يا بوسي
اولاً تم تعديل الأسم :D
ثانياً .. مهو اه ممكن يعملوا كل اللي بتقول عليه
لَكن برضو مازال صعب عليهم ، بنات زي الورد
يخشوا زراعه والكلام دا ... وبعدين اهاليهم دول ايه ذنبهم يعني ##
وبعدين موضوع الوضاعه ده انا اللي طلعته !
يمكن يحسوا بتأنيب الضمير شويه
عل العموم ثانكي علي كومنتك ومرورك
وشكراً للنصيحه
تحياتي
بسنت نبيل
نقوم الان باجراء تقييم شامل للمدونات المضافة الي دليل زوارك بهدف معرفة المدونات الجيدة والمدونات غير الجيدة وذلك تمهيداً لحصول المدونات الجيدة علي حملة دعاية مجانا ستنطلق حملة الدعاية الاولي يوم 5/11/2011 وذلك للمجموعة الاولي من المدونات التي ستقيم كجيدة
وذلك وفقا للمعايير التالية
1-محتوي المدونة جيد
2-محتوي المدونة متجدد
3- المدونة تضع رابط الدليل أو رابط مجلة السلسلة
ستعلن نتائج التقييم في صفحة الدليل الرئيسية والتقييم الثاني سيكون ان شاء الله في يوم 15/11/2011
نتطلع لخدمتكم
فريق عمل مجلة السلسلة
dir.zowark.com
إرسال تعليق